El Principáu piensa nel centru y occidente pa los parque eólicos flotantes

Un total de 20 empreses yá se sumaron al proyectu ReCoDe

Los parques eólicos flotantes que se van instalar n'Asturies, pel momentu dos, van perfilando'l so allugamientu. A falta de definir el mapa marítimu de la enerxía eólico n'España, el Gobiernu d'Asturies piensa nel centru y l'occidente.

Va ser solo una de les nueves fontes d'enerxía anovable de nueva creación cola que se va xenerar hidróxenu verde, por aciu de diez electrolizadores. Sumaríense tamién parques solares, instalaos na zona centru entá por definir, miniturbines en dellos calces de ríos y l'aprovechamientu d'agua de mina nes cuenques mineres.

El proyectu ReCoDe H2 axunta a 20 empreses yá, ente les que tán dende Iberdrola y EDP, hasta Duro Felguera, TSK, Imasa, Rioglass o CGS, la postrera en sumase. Van optar a fondos europeos y españoles y van poder ser independientes, pa que si unu nun espolleta'l restu puean salir alantre.

El proyectu afita otros cinco electrolizadores conectaos directamente a la rede como garantía de suministru, que va poder dar una nueva vida al espaciu de les térmiques d'Iberdrola y EDP.

Los últimos cinco de los 20 electrolizadores van xenerar hidróxenu verde pa destinalo directamente a procesos industriales nel sector aceru, papel, cementeru y químicu.