El Principáu va defender dafechu'l so plan de xestión del llobu

Les organizaciones agraries califiquen de nefasta la prohibición de cazar llobos​

El Principáu refuga dafechu la inclusión del llobu como especie protexida, lo que torga que puea cazase. Asina lo aseguró'l conseyeru de Mediu Rural, Alejandro Calvo, tres xuntase esta mañana con representantes de Galicia, Cantabria y Castiella y Lleón, pa decidir qué acciones van tomar.

Refuguen que la inclusión de llobu nel llistáu d'especies protexíes se tomara nuna votación na que teníen el mesmu votu, por casu les islles, que recuerden, nun tienen llobu nin lo van  tener.

Tienen amás duldes xurídiques sobre la validez de la orde ministerial, yá que dicen, podría invadir les sos competencies. Dende Mediu Rural defenden el caltenimientu del plan de xestión del llobu del Principáu. Recuerden que nes comunidaes que lleven años xestionando la especie, en nengún casu, ta en peligru.

Les organizaciones agraries califiquen de nefasta la prohibición de cazar llobos​

El colectivu 'Asturies Ganadera' calificó como nefasta la inclusión del llobu nel llistáu d'especies montesines en réxime de protección especial.

Los afectaos consideren qu'esta midida va complicar la xestión del llobu y van aumentar los daños de la cabaña ganadera por tol territoriu asturianu, polo que piden que los gobiernos autonómicos planten cara a esta decisión o de lo contrario yá anuncien movilizaciones.

Precisamente, los ganaderos de la sierra d'El Cuera siguen apostando polos controles poblacionales al considerar invidable la coesistencia ente la ganadería estensiva y el llobu. De lo contrario, señalen los afectaos, el ganáu menor va desapaecer y van aumentar a esgaya los daños al ganáu mayor.

Les seis organizaciones  d'Asaja nel norte del país calificaron esta decisión como un verdaderu despropósitu y alvirtieron que medrar la protección del llobu ye un ataque a la ganadería estensiva y al mundu rural.