El TC desestima'l recursu d'inconstitucionalidá escontra la Llei de Montes

Unidos Podemos consideraba que la llei entraba en contradicción cola norma estatal

El Tribunal Constitucional desestimó'l recursu d'inconstitucionalidá presentáu por más de 50 diputaos d'Unidos Podemos escontra la modificación de la Llei de Montes del Principáu que suprimió los acotamientos al pastoréu en terrenos quemaos por quemes forestales.

Unidos Podemos promovió'l recursu por considerar que la llei asturiana entraba en contradicción cola norma estatal y que nun cumplía colos estándares mínimos de protección ambiental, si bien el Constitucional diz nun ver "un patente retrocesu nel grau de protección".

Amás, insiste en que la normativa básica estatal suprimió'l carácter obligatoriu del acotamientu temporal del pastoréu nos terrenos afectaos por una quema.

La modificación de la norma foi aprobada pol Parllamentu asturianu'l pasáu 24 de marzu a propuesta del PP y col sofitu de los demás grupos, menos Podemos.

La modificación de la Llei de Montes tamién foi recurrida énte'l Constitucional pol Defensor del Pueblu.