El fiscal asegura que Villa "corrompió'l SOMA"

Villa diz que tien "déficits mui importantes que provoquen confusionismu"

El xuiciu escontra l'ex-dirixente sindical José Ángel Fernández Villa quedó güei vistu pa sentencia tres una sesión na que'l fiscal caltuvo'l so pidimientu de cinco años de cárcel por "corromper el SOMA", l'acusación particular xubió la pena a seis años y la defensa pidió la llibre absolución.

Fernández Villa faló nel turnu d'última palabra na Audiencia d'Uviéu y dixo que tien "déficits físicos mui importantes" que lu llenden y provóquen-y "confusionismu".

La vista oral entamó esta mañana col informe de calificación final del fiscal, que conseñó que Villa caltuvo "una continuidá delictiva, que nun yera puntual" y que llevó a la "descapitalización” del SOMA-UXT, que lideró 35 años.

Villa tomaba decisiones que "yeren aceptaes y sofitaes" por "toos y naide lo discutía porque lu protexíen", lo que fizo que pudiera "descapitalizar el sindicatu", amestó'l fiscal, qu'imputa al ex-líder sindical por un delitu siguíu d'apropiación indebida pol desvíu de 434.158 euros del sindicatu al so patrimoniu personal.

L'acusación pública calificó a Villa como "l'amu que dominaba con mano de fierro al sindicatu", y rechazó que nel "descontrol" de la contabilidá del SOMA tenga dalguna responsabilidá l'ex-contable Juan Cigales.

El fiscal amestó que Villa, pese a tener embargaos los sos bienes, regularizó 1,4 millones d'euros al acoyese a l'amnistía fiscal y esplicó qu'entá tien una alta capacidá económica y una pensión.

Amás, el fiscal censuró la conducta de Villa, que calificó de "illexítima" al nun tar sofitada por decisión dalguna d'autorización de la Xunta d'Alministración" y, pese ello fizo "unos gastos que provoquen plasmu", que pasaba al sindicatu anque yeren puramente "personales".

De siguío tomó la palabra l'abogáu Miguel García-Vigil, qu'exercita l'acusación particular en representación del SOMA, quien aseguró que Villa yera "la persona más poderosa d'Asturies" y eso dexó-y crear una estructura a la so semeyanza con una falta de mecanismos de control pol so poder omnímodu".

El lletráu recordó que les secretaries de Villa declararon nel xuiciu qu'elles cobraben los cheques que depués-y apurríen personalmente y que-yos pidía "discreción”.

Igualmente destacó cómo l'ex-contable Juan Cigales llegara a manifestar que cuando él preguntó por dellos gastos ensin xustificar dixéron-y: "tu paga y chitón".

L'abogáu repitió que les cuentes "nun s'esponíen, nin detallaben" y que Villa "entamó y planió" una estructura a la so semeyanza pa refugar esi control sindical.

Pela so parte, l'abogada defensora de Villa, Ana García Boto, negó qu'hubiera "una continuidá delictiva" y alvirtió que'l so enxuiciamientu ye un "encarnizamientu xudicial" que fizo qu'él sufriera dos anxines de pechu que "podríen derivar en cualquier momentu nun infartu".

Eses dos anxines de pechu son les que, a lo llargo del procesu xudicial, llevaron al so ingresu en Cardioloxía del Hospital Universitariu Central d'Asturies (HUCA) y obligaron a suspender dos vegaes el xuiciu.

La lletrada alegó vulneración del derechu de la defensa a tener "un xuiciu xustu", ente otres razones, por sentar nel banquín a Villa ensin "la prueba de contradicción" al ver los médicos forenses "namás papeles y non al mio veceru" tres los ingresos hospitalarios pol so delicáu estáu de salú.

La lletrada afirmó que Villa ye "inocente" y recordó que la regularización de 1,4 millones de Villa entá nun derivó "nuna imputación", polo que pidió que se condergue al sindicatu a pagar los costos del xuiciu "pola so temeridá, al entainar la imputación pa facer lleña del árbol cayíu".