El miel postúlase como motor de la economía nel conceyu de Bual

L'embalse de Doiras podría ser un enclave estratéxicu de futuru

La minería dio en Bual de comer a munchos vecinos. Yá nel sieglu XVIII había 90 ferreros y ocho mazos. Güei inda vemos llevantáu, n'estáu ruinosu, eso sí, dalgunos d'esos vieyos resclavos.

El wolframiu llegó a dar empléu nel conceyu a más de 250 persones. Yera la década de los 50 del pasáu sieglu. D'equí salía'l material que depués s'emplegaba na industria armamentística. Yera una dómina de rellume económicu qu'entamaría a desapaecer nos años 80.

Entá anguaño, dalguna empresa interesóse en volver a esplotar dalguna d'estes lladeres, pero nada se llevó alantre.
Foi'l pasáu de Bual. Güei'l presente pasa pel sector primariu. Un terciu de la población activa del conceyu dedícase a la ganadería. Hai 260 esplotaciones, la mayoría dedicaes a la producción láctea.

Pero'l sector emerxente ye'l del miel. Esti productu convirtióse nel más conocíu equí y referencia en tola rexón.

Un puñáu d'empreses dedíquense a producilo nel conceyu, pero esta actividá inda ye secundaria pa munchos vecinos. Una pequeña fonte d'ingresos sacaos d'unos pocos truébanos. Les abeyes bualeses producen al añu cerca de 30 tonelaes de miel.

La dulzura del conceyu ponse a prueba cada añu cola Feria del Miel, l'eventu con mayúscules. Equí viéndese miel, pero tamién imaxe, daqué fundamental.

Imaxe, y bien bona, tamién atopamos en munchos puntos de Bual. El turismu ye otru de los sectores con puxu. Sobre manera l'activu. El ríu Navia dexa facer deportes d'aventura, y eso aprovéchenlo dende va tiempu delles empreses.

Unu de los retos de futuru pasa por potenciar llugares como l'embalse de Doiras, un enclave que munchos ven como motor económicu emerxente.