El plan de salvamentu en playes movilizará a más de 300 profesionales

Los rescates en padde surf son la principal novedá d’esti añu

El Plan de Salvamentu en Playes del Principáu d’Asturies (Sapla) d’esti añu movilizará a 313 profesionales, de los que 278 son socorristes, 17 lancheros y 18 coordinadores municipales, en 18 conceyos asturianos, hasta’l 30 de setiembre viniente.

El conseyeru de Presidencia, Guillermo Martínez, presentó esta mañana’l Sapla en Muros y dio anuncia de qu’instalará puestos de salvamentu en 66 sableres, de los que 60 tendrán serviciu caldía y 6 en fines de selmana.

El plan Sapla, vixente dende l’añu 2001, esparde la so cobertura a les 211 sableres asitiaes nos 483 kilómetros de superficie costera del Principáu.

Ente los sos oxetivos tán el rescate de bañistes en peligru, l’asistencia sanitaria a los usuarios, la evacuación de mancaos o persones enfermes y la prevención pa evitar riesgos innecesarios.

A esti dispositivu amiéstense les siete playes de Xixón, con serviciu de salvamentu propiu, nes que la organización y recursos cuerren al cargu del Ayuntamientu, anque actúa de mou coordináu col Serviciu d’Emerxencies (Sepa), recordó’l Gobiernu rexonal.

De los 394.000 euros colos que’l Principáu financia, 345.000 destínense a la colaboración colos ayuntamientos pa sufragar los gastos del alquiler de casetes de los puestos de salvamentu y la incorporaciónde los socorristes y los profesionales encargaos de les lanches, que tarán a pie de playa dende les 12:00 hasta les 19:00 hores.

Los otros 48.875 euros sirven pa financiar el material necesario pa desendolcar el serviciu, según esplicó’l conseyeru Guillermo Martínez.

"El Sepa tamién cede a los conceyos material valorao en 600.000 euros, como embarcaciones y motos acuátiques, cartelería y elementos de señalización, desfibriladores y equipos d’osixenoterapia y de telecomunicaciones", destacó’l titular de Presidencia.

Martínez valoró la collaboración que presten los conceyos y el llabor que faen tanto’l Sepa como les policíes locales, los Cuerpos y Fuerces de Seguridá del Estáu, les unidaes asistenciales del Serviciu d’Asistencia Médica Urxente (SAMU), les agrupaciones municipales de voluntarios de Protección Civil, la Unidá de Protección Civil de la Delegación del Gobiernu, la Sociedá Estatal de Salvamentu Marítimu, el Llaboratoriu de Salú Pública del Principáu y Cruz Roja.

"El so trabayu permite una rempuesta, añu a añu, cada vez más rápida y mui eficaz na coordinación de toles persones que participen nel operativu", dixo.

Amás, esplicó qu’en 2017 contabilizáronse 10.574 intervenciones, la cifra más baxa de los últimos once años.

D’estes intervenciones, el 92,02 por cientu fueron por primeros auxilios prestaos polos propios servicios de salvamentu a pie de playa y namái en 91 casos necesitóse’l treslláu de los afectaos a centros sanitarios.

En total, hebo 232 rescates, el 70,2% por parte de los socorristes de les distintes sableres, según los datos oficiales.

Dempués de la presentación, fecha nel Ayuntamientu de Muros, el conseyeru, acompañáu pola alcaldesa, Carmen Arango, el xerente del Sepa y los representantes de los conceyos costeros treslladáronse a la playa d’Aguilar pa ver dos exercicios de rescate acuáticu fechos polos servicios de salvamentu.

Unu de los simulacros foi con moto d’agua y l’otru con tablón de rescate, mientres que los socorristes exercitáronse énte una posible atención sanitaria con maniobres de reanimación cardiopulmonar.

Nes playes de Muros (Aguilar, Los Llanos y San Esteban) rexistráronse l’añu pasáu cerca de 860 intervenciones, lo que convierte al conceyu nel cuartu nel que más actuaciones se llevaron alantre.