El proyectu de remocique d'El Muro elimina'l vehículu priváu de la zona

L'Ayuntamientu de Xixón apuesta por más espacios verdes, xuegos infantiles y terraces

L’Ayuntamientu de Xixón sigue alantre col remocique d’El Muro San Llorienzo col envís de medrar les sos ceres, zones verdes y estanciales y albergar una plataforma única que tendrá una vía de serviciu pela que nun podrá pasar el vehículu priváu.

El conceyal d’Obres, Olmo Ron, y el de Mediu Ambiente y Movilidá, Aurelio Martín, presentaron esti miércoles el proyectu pal remocique d’El Muro San Llorienzo, que tendrá un presupuestu de 15,8 millones d’euros. L’executivu local quier que les obres, que s’esparderán 36 meses, entamen pa final de 2022.

El remocique, que s’esparde dende El Campu Valdés hasta El Rinconín, ta sofitada pola seguridá xurídica a pesar de la sentencia del xulgáu de lo contencioso alministrativo númberu 1 de Xixón qu’anulaba la peatonalización parcial llevada alantre pola pandemia de coronavirus.

Asina lo aseguró l’edil d’Obres, Olmo Ron, qu’afirmó que la sentencia refierse a “una intervención puntual en xunetu de 2020 y nada que ver con esti proyectu d’anovación de la fachada marítima”.