Fuelga multitudinaria escontra la Llomce y los recortes

El Sindicatu d'Estudiantes cifra'l seguimientu nun 90%

La fuelga xeneral na educación rexistró un seguimientu mayoritariu n'Asturies con una participación penriba del 90 por cientu na universidá y al 70 nos centros d'enseñanza, amás de les manifestaciones feches n'Uviéu y Xixón a les que fueron cientos de persones.

El Sindicatu d'Estudiantes cifró en más del 90 por cientu'l seguimientu que tuvo la convocatoria ente alumnos que cursen los sos estudios na universidá asturiana mientres que nes demás etapes educatives tuvo en porcentaxes penriba del 70%.

Per parte de so, la Conseyería d'Educación cifró nun 21 por cientu'l seguimientu de la fuelga del profesoráu de la educación non universitaria.

La protesta estudiantil reivindica una educación gratuita, pública, igualitaria, ensin llendes nin torgues pa que los alumnos puean entrar a la carrera universitaria que quieran cursar, señaló un voceru del colectivu convocante.

Los estudiantes refuguen la torga que supón les "altes" tases económiques qu'establecen les matrícules universitaries asina como la dificultá de les pruebes d'accesu, sobre les que'l Sindicatu d'Estudiantes alerta de que los alumnos con pocos recursos "nun puen pagar" una academia pa preparar los exámenes.

Matrícules, Erasmus y másteres son, n'opinión del Sindicatu d'Estudiantes, les principales reivindicaciones del colectivu, qu'insistió nel so pidimientu pa que la Llomce seya derogada.

N'Uviéu, cientos de manifestantes concentráronse esti mediudía na Plaza d'España tres una pancarta de cabecera na que se podía lleer "Nin Llomce nin 3+2. El fíu del obreru a la universidá".

Darréu los manifestantes, que tamién llevaben otres pancartes intercalaes ente los distintos grupos que participaben nel percorríu, ficieron un camín alredor del campu San Francisco hasta tornar al puntu de salida, delantre la sede de la Delegación del Gobiernu n'Asturies y de la Conseyería d'Educación.

En Xixón, dellos centenares de persones, les más d'elles mozos, participaron na manifestación convocada pol Sindicatu d'Estudiantes en defensa de la educación pública y laica.

Los manifestantes, ente los que taben padres de familia acompañaos de los sos fíos d'Infantil y Primaria, concentráronse na Plaza del Institutu y percorrieron les cais del centru de la ciudá p'acabar na Plaza Mayor.

La columna tuvo delantre una pancarta cola lleenda "Non a los recortes, a la Llomce y al 3+2" y entonó cantares como "menos crucifixos más trabayu fixu" y "los fíos del obreru a la universidá".

La protesta desendolcóse ensin incidentes coles fuercies de seguridá.