IX reclama mecanismos pa frenar les agresiones y amenaces a cargos públicos

Concentración frente a la Delegación del Gobiernu en refugu a la violencia anónima y gratuita

Una concentración, convocada por Izquierda Xunida (IX) d'Asturies, a la qu'asistieron cargos municipales y rexonales de la coalición y de Podemos, visibilizaron el refugu a tou tipu de violencia "cobarde, anónima, ensin escrúpulos, infame y gratuita" tres les amenaces surdíes esontra conceyales d'IX en Riosa y tres l'asesinatu del so conceyal en Llanes, Javier Ardines.

L'alcaldesa de Riosa, Ana Díaz, y la secretaria d'organización d'IX en Llanes, Begoña Collado Villa, lleeron un manifiestu nel qu'aseguraron que, pese a les amenaces, van siguir alantre y nun se van dexar amedranar énte unos actos que calificaron como "deleznables".

Dambes espresaron el so sentimientu de repulsa énte estes actuaciones y encamentaron a les instituciones de cualquier "ámbitu y nivel, tanto municipales y autonómiques como estatales y supranacionales", a que pongan en marcha cuantos mecanismos seyan necesarios pa frenar esta fola de violencia escontra los cargos institucionales, electos democráticamente.

Aseguraron qu'estos cargos tán viéndose persiguíos por exercer la so función pública de manera "coherente y llegal", dixeron, y alvirtieron que nun van tolerar la más mínima involución a los derechos y llibertaes algamaos democráticamente.

"Equí tamos, nun nos escondemos, xuníos, fuertes, valientes, impulsaos pola sede de xusticia, reprobando la naturaleza mezquina de les conductes llaínes que nos traxeron hasta equí y que nun han quedar impunes", señalaron.

Díaz y Collada pidieron el máximu respetu pa la familia, amigos y compañeros del edil asesináu, Javier Ardines, y esixeron que s'investigue la "sangría de filtraciones" que se tán produciendo, pese al secretu de sumariu decretáu, porque namás tán contribuyendo, conseñaron , a aumentar "el dolor y la incertidume, especialmente de la familia del nuesu compañeru".

Un asesinatu que confíen en que puea aclariase cuanto enantes y que, na so opinión, foi utilizáu de la manera "más ruin, nun intentu d'estender el terror a los compañeros y compañeres de Riosa en forma d'anónimos con amenaces de muerte, aludiendo de forma esplícita a tan execrable, bederre y reprobable crime, y que ye un atentáu escontra la so integridá personal y política", espresaron.

El manifiestu concluyó cola frase "nun tenemos mieu" siguida d'una zarrada ovación de los asistentes a la concentración.

A esta movilización, que se fizo frente a la Delegación del Gobiernu n'Uviéu, asistieron, entre otros, los responsables federales d'IX Ismael González, Lola Sánchez Tudela, Noa Román, y la práctica totalidá de la dirección d'IX n'Asturies como la vicepresidenta primera de la Xunta, María José Miranda y los diputaos Gaspar Llamazares, Ovidio Zapico, Concha Masa y Marta Pulgar.

Tamién participaron, entre otros, los alcaldes de Mieres, Illas, Castrillón, el conceyal d'Uviéu Roberto Sánchez Ramos, y los diputaos de Podemos Daniel Ripa, Paula Valero y Lucia Montejo.

Darréu una representación d'IX entrevistóse cola delegada del Gobiernu, Delia Losa, a la que pidieron la máxima implicación pa resolver el crime d'Ardines y l'esclarecimientu de los anónimos recibíos polos conceyales de Riosa.

Pal próximu llunes ta convocada a les 13:00 hores la Xunta de Seguridá.