Industria afita'l llunes pa la mesa de trabayu del ERE de Vesuvius

15.500 firmes contraries al Ere de Vesuvius que yá van camín de Londres

El Ministeriu d'Industria convocó pal próximu llunes n'Uviéu la primer xunta de la mesa de trabayu p’analizar l'ERE presentáu por Vesuvius, na que van participar representantes de les alministraciones central y rexonal, de la empresa y de los trabayadores, informó CCOO d'Industria.

El sindicatu valoró la convocatoria d'esta mesa pa tratar de buscar alternatives al ERE que supondría'l cese de l'actividá industrial de Vesuvius, grupu británicu dedicáu a la ellaboración de productos refractarios pa la siderurxa, nes sos plantes de Llangréu y Miranda de Ebro, onde cuenta con 111 y 17 trabayadores, respectivamente.

La organización sindical tamién celebró l'escritu unviáu pol director xeneral d'Empléu y Formación del Principáu, Pedro Fernández-Raigoso, a les partes implicaes nel qu'aboga por ampliar el periodu de consultes "el tiempu afayadizu cola cuenta d'atopar soluciones razonables qu'eviten los graves efectos sociales y económicos" del ERE.

Según Fernández-Raigoso, que reconoz "la plena llibertá" de caúna de les partes pa espresar y afitar les sos posiciones y argumentos, el zarru de la planta "nun debería facese ensin un periodu negocial de suficiente y proporcionáu llargor".

L'oxetivu, amiesta l'escritu, tien que ser que les partes, cola collaboración de les alministraciones públiques, puean "atopar soluciones non traumátiques que minimicen la repercusión social de les midíes plantegaes nesti espediente".

Énte'l "grave impactu" nel empléu y l'alarma social, dende'l Principáu faen un llamamientu a les partes "con cuenta que se pescuden toles víes posibles pa tratar d'algamar un alcuerdu".