Webcams
Buscar
Les partes nun podrán tener accesu a la copia del sumariu hasta mediaos de la selmana qu'entra
Un total de 16 persones apaecen como investigaes na Operación Hulla. La cifra diola a conocer el Tribunal Cimeru de Xusticia d'Asturies na primer información oficial qu'ufierta al respeutive.
Yá hai 12 partes personaes nesta presunta trama de comisiones illegales. Dende'l Tribunal Cimeru de Xusticia d'Asturies calculen que nun sedrá hasta mediaos de la selmana qu'entra cuando les partes puean tener accesu a la copia del sumariu.
El xulgáu ta entovía foliando la documentación aportada y ta previsto que mañana pida formalmente al Principáu la dixitalización de les actuaciones.
Dende 'l Gobiernu rexonal aseguren que ye una práctica avezada tener qu'encargase d'escanear cuando les causes son escomanaes.
Per otra parte, la defensa del arquitectu de la obra del Montepío recurre l'autu de la xueza de midíes cautelares.
Según pudo saber TPA Noticies, nel so escritu refuga que-y intervengan tol so patrimoniu y reclama que, nel so llugar, se fixe una fianza en función de les posibles responsabilidaes. Anque, insiste, en que nun cometió irregularidaes.
Esti ye'l primeru de los recursos que llega al xulgáu escontra l'autu de midíes cautelares, pero nun sedrá l'últimu. Delles defenses tán ultimando yá les sos alegaciones.
Según fontes xudiciales, nel so escritu, la defensa del arquitectu Manuel Sastre cuestiona que les partes entovía nun tengan tola documentación necesaria pa poder enfrentare a esti casu.
Reconoz que l'arquitectu participó na comisión técnica que valoró les ufiertes pa seleccionar al contratista del Xeriátricu pero recalca que yera la comisión rexonal del Montepío la única que tenía capacidá de decisión na axudicación de la obra.
Cuestiona, amás, que nun se tomaron les mesmes midíes cautelares colos otros miembros que formaben parte de la comisión técnica. Insiste la defensa del arquitectu, en que esti namái cobró los sos honorarios y que nun hai indicios de qu'haya patrimoniu ocultu nel so poder.
Quien nun va recurrir l'autu ye la defensa del constructor Juan Antonio Fernández. Eso sí, el so lletráu pidirá que s'adapten les midíes cautelares a la so situación familiar y la de les sos empreses.
En concreto que se desbloqueen les cuentes pa dexar que reciba ingresos y que los gastos s'adapten a les necesidaes reales del nuedu familiar. Reclamarán tamién la devolución de los coches incautaos.
