Noticies n'asturianu
Fuente: RTPA, 17 de febreru. 2020 15:10

Julián Valle, toa una vida sacando fluorita en Caravia

En castellano: Julián Valle, toda una vida barrenando mineral en Asturias
Julián Valle, barrenista de las minas de fluorita en Caravia

El barrenista trabayó tamién en mines de carbón y de fierro

Fai más de 35 años que Julián Valle entró per primer vegada nuna mina. Güei volvió facelo, anque la vieya bocamina de la Mina Obdulia ta invadida polos artos, y a Julián invádenlu les alcordances d'una dómina que nunca va volver.

Esti vecín de Caravia ye fíu de mineru y per más de 20 años trabayó, como so padre, sacando espato flúor de les coraes d'esti conceyu.

El trabayu de barrenista nes mines de fluorita nun se paez enforma al que se lleva alantre nes mines de carbón, que Valle tamién conoció nun curtiu periodu de la so trayectoria profesional.

La so llegada a les mines coincidió cola mengua del sector. Malapenes al añu d'entrar en Mina Norberto, la esplotación cesó la so actividá. Son los años 80, el mineral empieza a escosar y produzse una traxedia que contribúi a acelerar esti procesu: cinco mineros pierden la vida na mina d'Argüelles-Foncaravia en marzu de 1.982.

Tres unos años barrenando nes mines de fierro de Vizcaya, Valle torna a la so tierra pa volver somorguiase nes galeríes de la última esplotación activa de Caravia. Na mina Jaimina pasa 20 años, de nuevo como barreneru, sacando la última fluorita d'esta veta.

Jaimina cierra en 2015, y güei yá solo queda abierta la Mina Emilio de la vecina Lloroñi, en Colunga.

Anque l'espato flúor sigue bien presente na memoria d'aquellos que, como Julián, dedicaron la so vida a sacar esti mineral.

Comparte