L’Asociación Cultural Entremís trabaya por recuperar la historia y el patrimoniu de Zarréu

Unu de los sos primeros llogros foi la recuperación del pendón de Zarréu

L’Asociación Cultural Entremís nació nel 2015 de la mano d’un grupu de persones que se propunxeron recuperar parte de la historia y el patrimoniu de Zarréu. Güei son una ventena de socios oficiales, pero nes sos actividaes collabora tol pueblu.

Tino García Blanco señala qu’unu de los sos primeros algames foi la recuperación del pendón de Zarréu, un distintivu usáu na Edá Media pa reconocer a los diferentes reximientos.

Agora ondea cada añu nes fiestes patronales de San Roque. Esi mesmu día’l pueblu engalánase con otra tradición recuperada por Entremís, la de los arcos que los vecinos decoraron con flores y mantos artesanales pa que seyan bendecíos al pasu de la procesión.

Dende 2015, Zarréu viaxa cada añu nel tiempu a 1810 pa recrear el momentu históricu en que la Xunta Superior d’Asturies fizo escala nel pueblu. Fuxendo de les tropes napoleóniques dempués de la ocupación d’Uviéu, constituyóse en L.luarca y los sos miembros viéronse obligaos a dir desplazándose después pal suroccidente según diben siendo cercaos.

Cola collaboración de tol pueblu y d’asociaciones de recreación histórica, escenifícase la llegada a Zarréu de les llamaes Xuntes Errantes, qu’alcontraron l’abellugu y ayuda de la población local, que plantó cara a los franceses.

Tamién contribuyó na puesta en marcha del itinerariu del Bosque Máxicu y organizando actividaes colos más pequeños. Siguen trabayando nel proyectu del estelariu de la llaguna de L.langreiros pa promocionar Zarréu como una reserva Starlight.

L’Asociación Entremís tamién foi fundamental pa la puesta en marcha de la sienda del patrimoniu minero-industrial y fai actividaes y cursos tol añu.