L’alcalde d’Uviéu separta del so cargu al xefe de la Policía Local

El so sustitutu temporal sedrá’l xefe de División Operativa d’anguaño, Luis Manuel García Pena

L’alcalde d’Uviéu, Wenceslao López, separtó del so cargu al xefe de la Policía Local d’Uviéu, José Manuel López, por perda de confianza y dio anuncia de que’l so sustitutu temporal sedrá’l xefe de División Operativa d’anguaño, Luis Manuel García Pena.

El cese dase dempués de que José Manuel López fuere interrogáu’l martes pasáu por axentes de la UDEF nel marcu de la "Operación Enredadera", desendolcada en decenes de conceyos de toa España por amaños na contratación de sistemes de control de tráficu.

Sicasí, el rexidor, solliñó que’l cese nun ye por un "casu aislláu", en referencia a la so posible implicación nel "Casu Enredadera", sinón a una serie de socesos que se fueron produciendo nel tiempu.

Los abogaos de José Manuel López calteníen ayeri que l’hasta anguaño xefe de la Policía Local d’Uviéu nun tenía "competencia, nin conocimientos técnicos pa facer un pliegu de prescripción técnica p’amañar contratos".

La causa, que continúa secreta, ta abierta polos delitos de prevaricación alministrativa, fraude a l’alministración pública, malversación de caudales públicos, tráficu d’influyencia, revelación d’información privilexada, falsedá documental, sobornu, alteración de precios de concursu públicu y pertenencia a organización criminal.