L’aparexador del Ayuntamientu d’Ayer afita qu’emitió informes desfavoratibles al xeriátricu

Los responsables políticos desoyeron la recomendación del técnicu de parar les obres

Nel xulgáu qu’instruye’l 'casu Hulla', el supuestu desvíu de fondos na construcción de la residencia de Felechosa, declararon como testigos esta mañana tres trabayadores del Ayuntamientu d’Ayer.

Ente ellos, l’aparexador municipal nel momentu de los fechos que s’investiguen, qu’afitó, como yá fizo énte la UCO, qu’emitió dellos informes desfavoratibles sobre les obres del xeriátricu.

Según pudo saber TPA Noticies, inclusive nunu d’esos informes pidía que se pararen les obres. Tamién dixo qu’a pesar d’eso, los responsables políticos decidieron siguir alantre.

La Fiscalía decidió parar l’interrogatoriu de la secretaria del Ayuntamientu d’Ayer, porque piensa citala como investigada en vez de como testigu porque yera la máxima responsable de los servicios xurídicos del Ayuntamientu. Tamién declaró esta mañana un técnicu d’Ayer.