L'Audiencia Provincial suspende'l xuiciu del casu Niemeyer un mes

L'abogáu de Natalio Grueso pidiera un "tiempu prudencial" pa poder estudiar la causa

L'Audiencia Provincial d'Uviéu alcordó güei suspender 30 díes el xuiciu escontra l'ex-director xeneral de la Fundación Niemeyer Natalio Grueso n'atención al pidimientu fechu pol so abogáu, qu'asumió la causa va unos díes y nun cuntó con tiempu abondu pa estudiala.

La Sección Tercera de l'Audiencia adoptó la decisión tres les cuestiones previes plantegaes poles partes nuna causa na que Grueso encara un pidimientu de la Fiscalía d'once años de prisión por presuntes irregularidaes rellacionaes con factures falses o manipulaes na so dómina al frente del centru cultural avilesín.

L'Audiencia consideró que'l pidimientu del nuevu abogáu de Grueso, qu'asumió la so defensa tres l'arrenuncia d'otros dos lletraos nes últimes selmanes, ta xustificada.

L'abogáu, Fernando Burgos, pidiera un "tiempu prudencial" pa poder estudiar la causa y evitar que se produza "una vulneración de facto" yá que malapenes tuvo tiempu nos tres díes que trescurrieron desque asumió la defensa pa estudiar los 20.000 folios del procedimientu.

Natalio Grueso ta en prisión provisional ensin fianza dende'l pasáu martes en cumplimientu de la orde dada pol tribunal por tar en paraderu desconocíu y facilitar dos cases nes que nun vivía, lo qu'imposibilitaba apurri-y la citación al xuiciu.

El so abogáu, qu'espresó'l so preste pola suspensión de la vista pa cuntar con tiempu abondu pa estudiar el sumariu, avanzó en declaraciones a los periodistes la so intención de pidir la llibertá de Grueso.

L'ex-director xeneral de la Fundación Niemeyer encara un pidimientu por parte de la Fiscalía d'once años de cárcel, diez d'inhabilitación y multa de 24.000 euros, acusáu de los delitos siguíos de malversación en concursu medial con falsedá, otru societariu y un terceru d'insolvencia punible.

Xunto a Grueso van ser xulgaos l'axente de viaxes J.M.V.R., qu'encara un pidimientu fiscal d'ocho años como presuntu cooperador en dos delitos d'estafa y malversación, y l'abogáu José Luis Rebollo, ex-secretariu de la Fundación Niemeyer, como supuestu cooperador necesariu nun delitu societariu, sobre quien pesa un pidimientu fiscal de 2 años y 3 meses.

Nel banquín de los acusaos tamién van tar J.P., ex-muyer de Natalio Grueso, a quien el fiscal imputa pola so complicidá nun delitu siguíu de malversación pol que pide 2 años y 6 meses, y Marc Martí, ex-xefe de producción del Centru Niemeyer, qu'encara un pidimientu d'un añu y mediu de prisión pola so supuesta complicidá nun delitu de malversación.

Na vista oral, agora pendiente de nuevu señalamientu, ta previsto que declaren como testigos responsables políticos de la Conseyería de Cultura del Principáu, del Conceyu y del puertu d'Avilés en 2011 cuando entamaron les investigaciones tres les irregularidaes denunciaes pola ex-presidenta del patronatu del Centru Niemeyer y ex-conseyera socialista Ana González.

Amás de la Fiscalía, hai personaes dos acusaciones más: la particular, qu'exerce'l Principáu al traviés de la Fundación Centru Cultural Internacional Óscar Niemeyer, y la popular, qu'asume'l partíu Foro.

L'abogáu Alejandro Riera, en representación de la Fundación Niemeyer, pide 15 años y 6 meses de prisión pa Grueso, mientres que l'abogada María Teresa Domínguez, en nome de Foro, pide pal acusáu 13 años de cárcel.