L'agua, unu de los elementos más importantes de Taramundi

Conocemos el Muséu de los Molinos de Mazonovo y el Conxuntu Etnográficu Os Teixois

Os Teixóis ye un pueblu pequeñu cerca la capital del conceyu onde'l tiempu sigue inalterable. La so arquitectura tradicional y los sos inxenios hidráulicos siguen prácticamente nel so mesmu sitiu. En 2005 foi declaráu Bien d'Interés Cultural y enagora ye unu de los conxuntos etnográficos de mayor interés d'Asturies.

Visitando esti llugar entiéndese munchu meyor cómo les nuestres xeneraciones pasaes usaben un recursu como l'agua pa producir enerxía. Enerxía p'alimentar el mazu, pa trabayar el fierro, o la rueda d'afilar. Güei son miles les persones que s'averen añalmente pa percorrer estes ayalgues.

El Conxuntu Etnográficu Os Teixois ye unu de los cinco museos de tradiciones nel conceyu de Taramuni. Ente ellos destaca tamién el Muséu de los Molinos de Mazonovo, n'O Mazonovo, el mayor muséu de molinos del país. Más de 50.000 persones percuerren cada añu los 19 molinos de los qu'ocho son manuales, seis hidráulicos, tres específicos pa neños y dos especiales.

Los más antiguos fueron recuperaos y faen que'l visitante se convierta nel protagonista del muséu y ye que pue tocase pa esperimentar, porque los más de los molinos, necesiten de la so manipulación pa ponelos en funcionamientu.

Entender Taramundi ensin l'agua sedría imposible.