L'asesor xurídicu del Montepio asegura que'l so papel namái yera validar la documentación

Afirma que l'arquitectu foi'l que defendió que la constructora yera la meyor opción

L'asesor xurídicu d'anguaño del Montepío figura ente la ventena d'investigaos nel marcu de la Operación Hulla.

Na so declaración xudicial, según fontes averaes al casu, namái manifestó qu'él nun intervino nin na valoración técnica nin na económica pa la selección d'empreses del xeriátricu de Felechosa.

Esa valoración, según aseguró en sede xudicial, fízola l'arquitectu y dalguién del so equipu. Ellos fueron, según el so testimoniu, los que nuna xunta xeneral del Montepío, en 2008, defendieron por qué Alcedo de los Caballeros yera la meyor opción pa poner en marcha'l xeriátricu.

El so llabor como asesor, aseguró nel xulgáu, namái foi validar la documentación xurídica presentada poles empreses.

Tamién ta investigáu nesta causa l'apareyador de la obra, Vicente Fernández. Na so declaración xudicial, aseguró que foi nomáu pol arquitectu y que'l so papel namái foi llevar la dirección d'execución de la obra del xeriátricu.

La so robla, diz, apaez nes certificaciones d'obra porque esi yera parte del so facer como miembru de la direccion facultativa, pero recalcó énte la xueza que nun tenía un papel económicu.

L'asesor d'anguaño, l'apareyador y l'ex-asesor fiscal fueron los únicos investigaos qu'aceptaron contestar entrugues de la xueza y de los fiscales anticorrupción.

Nel casu del ex-asesor fiscal, al que la investigación da-y un papel relevante na trama, namái esplicó les sos actuaciones.

Fontes xudiciales aseguren que se defendió pero nun inculpó a naide nesta supuesta trama de comisiones illegales.