L'edificiu de Pumarín ye inutilizable porque quemaron les instalaciones básiques

Los vecinos puen entrar a poles sos pertenencies

Un informe del Conceyu d'Uviéu asegura que l'edificiu onde socedió ayeri la quema d'un bazar nun sufre daños estructurales, pero pel momentu los vecinos nun puen ser reasitiaos porque tán inutilizaes les instalaciones básiques.

El restu de los edificios de la contorna nun presenten daños reseñables. Nel día dempués del fueu, los vecinos intenten recuperar lo que puen de les sos cases.

Sí se va dexar a los vecinos recoyer los vehículos, que tán nel suétanu del inmueble. Anque entá falta por revisar una parte de la so estructura, los técnicos municipales visitaron esta mañana los edificios afectaos pol fueu.

Unu de los más afectaos ye l'inmueble cabo'l bazar, nel númberu 34. La pizzería asitiada nesi baxu foi clausurada porque, pel momentu nun pue desbloquiase la salida de fumos del local y el so trasteru, asitiáu na parte d'atrás, cuerre riesgu d'esbarrumbe.

Nel casu de los edificios de la cai Luis Braille, namás se percibieron pequeños desprendimientos que nun afectaríen a la habitabilidá de les viviendes.

Esti mediudía la policía xudicial tuvo nel bazar faciendo fotografíes y pescanciando tolos datos necesarios pa determinar l'orixe y les causes de la quema.

Fuentes de la Policía Nacional aseguraron esta mañana a TPA Noticies que nun tienen nicios de que les quemes de tres bazares chinos nes últimes selmanes tean rellacionaos. Afirmen que too paez indicar que'l de l'avenida de Pumarín foi casual, mientres que'l de Sotrondio puede tar rellacionáu con un intentu de robu.

Anque los axentes de la Policía Científica inda nun pudieron inspeccionar tol local quemáu ayeri, señalen que'l fueu aniciara nel almacén, una dependencia que tenía la puerta cerrada y tuvo que ser forzada polos bomberos.

Ellí tamién tán investigando los péritos de les aseguradores, compañíes que nun refuguen un orixe intencional, lo que se denoma un "cerillazu", bien pola necesidá de cambéu de local o bien pa compensar col pagu del seguru les baxes ventes. El bazar tenía llicencia comercial dende 2007.
Incendiu en Xixón

Un incendiu quemó esta mañana la vivienda d'un vecín de la parroquia de Santurio, na zona rural de Xixón. Otru vecín foi'l que dio la voz d'alarma a los Servicios d'Emerxencia al ver la fumareda.
Bomberos de Xixón, Policía Nacional y Guardia Civil participaron na estinción del fueu, pero la casa quedó dafechu destruyida poles llaparaes.