La FSA va someter los alcuerdos de gobiernu local y autonómicu al votu de los militantes

El nuevu modelu de partíu va ser unu de los asuntos centrales del congresu

Recuperar el protagonismu de la militancia ye'l gran oxetivu del 32 Congresu de la FSA. Los afiliaos van tener voz y votu nos pactos de gobiernu a nivel autonómicu y local, que tendrán que ser alcordaos nes asamblees de cada agrupación.

Tamién se-yos va consultar la postura que tien qu'adoptar el partíu na elección d'un presidente non socialista.

Nel Congresu propondrá'l derechu d'iniciativa política de los militantes, una especie d'iniciativa lexislativa popular que va riquir un 20% de les firmes de los afiliaos.

Los militantes tamién tendrán que ratificar la revocación del secretariu xeneral y van escoyer a 100 de los 300 miembros del comité autonómicu, el mayor muérganu del partíu ente congresos.

Estes y otres midíes van empobinaes, non solo a recuperar l'enfotu de la sociedá nes urnes, sinón a frenar la perda de militantes qu'esperimentó la FSA, 1.300 nos postreros cinco años. Tamién ta prevista la creación d'una secretaría de dinamización de la militancia.

En cuanto al funcionamientu del partíu, quier evitas lo socedío con Pedro Sánchez fai agora un añu, polo que se va proponer que la dimisión de la metá más unu de los miembros de la executiva nun va suponer el so cese.

Amás, afítase un máximu de 90 díes pa la vixencia d'una xestora, agora mesmo hai 10 n'Asturies, ente otros llugares en Xixón y Mieres.

La nueva FSA va dar una especial importancia a los conceyos y Iván Fernández va dirixir una secretaría de política municipal de la que van dependen otres dos de pequeños conceyos y de sofitu a los grupos socialistes na oposición. Inclusive'l secretariu xeneral comprometióse a visitar polo menos dos vegaes cada agrupación nel so mandatu.