La Fiscalía considera que la condena de Villa sienta un precedente pal 'casu Hulla'

El fallu especifica que la so conducta va dende 1989 hasta 2012

La Fiscalía considera que la sentencia escontra Fernández Villa por apropiación indebida sienta un precedente importante pa la investigación del 'casu Hulla'.

Según fontes de la Fiscalía, la sentencia acota'l poder d'influencia que tenía José Ángel Fernández Villa y considera importante que s'especifique nel fallu que la so conducta va dende 1989 hasta 2012. Feches clave porque incluyen la etapa na que fueron concedíes les subvenciones pa la construcción del xeriátricu de Felechosa. Esa dómina, ente 2008 y 2011, ye la que ta investigando Anticorrupción nel 'casu Hulla'.

Na so querella, Anticorrupción señala que'l poder sindical y políticu del que gociaba Fernández Villa dexó-y, asegura, influyir na decisión de conceder al Montepío la subvención de 31 millones d'euros pa la construcción de la residencia de Felechosa, magar que la normativa que regulaba naquel momentu l'axudicación nun contemplaba esa posibilidá.

P'Anticorrupción, Villa y Postigo xugaron un papel decisivu na concesión d'esos fondos públicos, y d'ende vendría l'arriquecimientu ilícitu qu'investiguen na operación..

Por ello, dende'l Ministeriu públicu consideren que'l fallu por apropiación indebida sienta un precedente importante pa la investigación del 'casu Hulla' y demuestra la collaboración esistente ente la Fiscalía d'Asturies y Anticorrupción pa persiguir el presuntu blanquéu de capitales cometíu por Fernández Villa.

La sentencia escontra l'ex-líder del SOMA, tamién va ser importante no que cinca al estáu de salú del sindicalista, yá que caltién que ta en condiciones de responder énte la xusticia.

Previstes nueves declaraciones pol 'casu Hulla' enantes qu'acabe l'añu

Primero que acabe l'añu va haber nueves declaraciones pol 'casu Hulla'. Ente les cuestiones que queden por investigar, ta si la mesma construcción del xeriátricu tenía en regla les llicencies afayadices y si estes llográronse siguiendo tolos trámites llegales.

Na operación Hulla, amás de Fernández Villa y José Antonio Postigo, tán siendo investigaes otres 13 persones, ente elles l'arquiteutu y constructor de la residencia.