La Fiscalía incoa d'oficiu dilixencies pol escape de gas d'Arcelor

Arcelor va caltener parada la instalación hasta garantizar el bon funcionamientu

La Fiscalía del Principáu d'Asturies incoó güei d'oficiu dilixencies d'investigación pa determinar la posible responsabilidá penal nel escape de gas ácido qu'hebo ayeri nes instalaciones d'ArcelorMittal n'Avilés.

El Ministeriu Públicu adoptó esta decisión dempués de qu'un escape de gas de combustión procedente de les bateríes de coque d'ArcelorMittal n'Avilés, que la empresa atribuyó a un fallu de diez minutos nun sensor que yá ta n'arreglu, provocara ayeri pela tarde problemes irritantes a los vecinos de la ciudá.

Les dilixencies d'investigación, con calter preprocesal, van tener una duración inicial máxima de seis meses, con posibilidá de prórroga, informó'l Ministeriu Públicu.

La conclusión d'estes dilixencies, precisaron dende la Fiscalía, pue ser per dos víes: cola presentación de la correspondiente denuncia, si se determina la esistencia de nicios d'infracción penal, o col archivu, nel casu contrariu.

Pela so parte, la directora xeneral de Prevención y Control Ambiental del Principáu, Elena Marañón, declaró güei que'l Gobiernu rexonal va estudiar la posibilidá d'imponer una sanción a ArcelorMittal pol escape de gas.

"Abrimos un espediente, tamos valorando, si procede, una sanción viendo los efectos y la repercusión qu'esto pudo tener, y si hubiere responsabilidá por cuenta d'insuficientes sistemes de garantíes y de control na planta de producción d'ácidu sulfúrico van ponese los fechos en conocencia de la fiscalía", indicó la directora xeneral.

Marañón esplicó qu'ayeri, a les 19:20 hores, recibióse nel Serviciu de Control Ambiental una llamada del 112 sollertando de qu'había una nube n'Avilés que taba produciendo efectos irritantes na población.

Arriendes d'esa llamada, personal de la Conseyería, cola directora xeneral de Prevención y la xefa del Serviciu de Control Ambiental a la cabeza, visitó la planta onde asocedió l'incidente y tuvieron valorando les causes del escape.

El fallu foi nuna sonda que controla l'ácidu sulfúrico que xeneró un escape de gas ácido, que produz efectos irritantes, aproximadamente unos quince minutos, según Marañón.

Pela so parte, el conseyeru de Presidencia, Guillermo Martínez, resaltó que'l Gobiernu rexonal, acordies cola dirección d'ArcelorMittal, alcordó caltener la paralización de les bateríes de coque nes qu'ayeri hebo l'escape de gas hasta garantizar el so normal funcionamientu y evitar qu'heba situaciones d'alarma como la provocada nel centru la ciudá.

Tanto Sindicatos como Corporación Avilesina quieren conocer cómo asocedió l'escape de gas de Bateríes de Cook n'Avilés y que se depuren responsabilidaes.

Los grupos de la oposición critiquen la falta de prevención y d'un protocolu d'actuación pa situaciones similares.

IX inclusive pide la creación d'una axencia medioambiental mientres que Podemos pidió una sanción "exemplarizante".

Mientres, l'alcaldesa d'Avilés, Mariví Monteserín,yá anunció qu'estudia acciones llegales en rellación col escape pa determinar si esistió dalgún tipu d'infracción medioambiental o rellacionada cola salú pública.