La Playa la Espasa, una de les sableres más visitaes del oriente asturianu

Cuando Leopoldo, sos tres hermanos y sos padres, Ángel y Josefina, llegaron a La Playa la Espasa, les vaques pastiaben en primer llinia de playa. Buscando na so memoria, namás ye quien a recordar una casa en pie, la del dueñu d’aquella esplotación ganadera. Sos padres y otra familia de collacios decidieron construyir les primeres cases de la urbanización d’anguaño: falamos de mediaos de los años sesenta.

El tardíu desendolcu d’unu de les sableres más apreciaes del oriente asturianu ta estrechamente venceyáu al espoxigue de la minería. Malapenes a un par de kilómetros, yá en Colunga, La Playa la Isla yera, yá entós, un renomáu centru de branu pa uvieínos, xixoneses y vecinos de les cuenques. Sicasí La Playa la Espasa vivía ayena al primer espoxigue del turismu porque la so contornada taba condicionada poles entós cinco esplotaciones que sacaben fluorita en la zona.

Sicasí, esta familia siempres apostó por esti llugar, y dende’l primer momentu víen que les mines diríen zarrando y La Playa la Espasa convertiríase no que ye enagora: una de les sableres más visitaes y reconocíes de tol oriente asturianu. A finales de los años setenta la presión minera va menguando, les comunicaciones meyoren y la sociedá asturiana entama a esfrutar d’un meyor nivel de vida. La Playa la Espasa entama a medrar.

L’entornu que conocemos güei, urbanizáu, axardináu, col paséu marítimu y los parques infantiles nun llegó hasta entamos d’esti sieglu. Nesti últimu desendolcu hai un factor que ta penriba del restu, y que nun ye otru que la construcción de l’Autovía del Cantábricu. La so apertura asitia La Playa la Espasa a media hora de Xixón y cuarenta minutos d’Uviéu.

Agora, de fechu, La Playa la Espasa ta de moda. A pesar de que cuenta con grandes zones d’aparcamientu, nun bon fin de selmana de branu enllénense toles places.

Pero, inclusive, nos díes más calorosos, La Playa la Espasa sigue calteniendo la so belleza, esi toque de sablera virxe que tanto gusta a los bañistes y qu’esti añu foi la imaxe qu’ilustró’l pabellón asturianu na Feria Internacional de Turismu de Madrid.