La Residencia Universitaria de Mieres usaráse p'afectaos esta selmana

La Universidá baraxa una EBAU en xunetu y acabar el cursu de forma telemática

La Residencia Universitaria de Mieres, que tien 112 places, entamará a ser utilizada p'agospiar a afectaos pola pandemia de COVID-19 a finales d'esta selmana, un usu que tamién podríen recibir más alantre los colexos San Gregorio y América, n'Uviéu, que cuenten con 120 y 80 places, respectivamente.

"Oxalá que nun faga falta", señaló nuna rueda de prensa telemática'l rector de la Universidá d'Uviéu, Santiago García Granda, que reclamó "un comportamientu exemplar" de los integrantes de la comunidá universitaria énte la crisis sanitaria d'anguaño.

El rector de la Universidá d'Uviéu, Santiago García Granda, señaló esti miércoles que, a falta de ver cómo evolucione la pandemia del COVID-19, baráxase l'aplazamientu al mes de xunetu de la EBAU y acabar el cursu académicu de les distintes titulaciones dando formación per internet.