Los campus de Xixón y Mieres van ser autosostenibles

Plan pa medrar la eficiencia enerxética na Universidá d'Uviéu

Los campus de Xixón y Mieres van ser autosostenibles. La Universidá d'Uviéu prevé instalar plaques fotovoltaiques que van suministrar el 80% de la enerxía que consume'l campus. La inversión va quedar amortizada en malapenes cinco años.

El 80% de la enerxía q’usa'l campus de Xixón o'l de Mieres va venir al curtiu plazu de plaques fotovoltaiques. La Universidá d'Uviéu prevé empezar la instalación el próximu añu y, a falta de decidir si les plaques les instala la institución o fai un conveniu con dalguna empresa, calcúlase que la inversión amortizaríase en pocos años.

Enantes d'eso, esti 2022 va empezar la instalación de plaques fotovoltaiques n'edificios universitarios d'Uviéu. Van ser l'avance d'un plan que prevé medrar la eficiencia enerxética de los campus. La Universidá decidió incluyir meyores de sostenibilidá en toles obres que necesiten los edificios, como la que se fai na Facultá d'Empresa pa evitar goteres.

Amás, nel primer cuatrimestre del próximu cursu, va empezar un proyectu pilotu pol que los profesores que tienen que movese ente campus pa dar clases usen vehículos eléctricos compartíos.

Un proyectu que podría estendese a los alumnos pa meyorar la movilidá, por casu, nel campus de Mieres. Nesti casu, la Universidá plantega faer un conveniu coles empreses de vehículos eléctricos pa que los universitarios tengan esti serviciu a preciu amenorgáu.