La Universidá piensa zarrar edificios en Navidá p'amenorgar la so factura enerxética

La factura de la lluz multiplicóse por dos al respective de 2019, a pesar de que la institución menguó'l consumu un 12%

De xineru a finales d’agostu d’esti añu, la factura eléctrica de la Universidá foi de cuasi 3,6 millones d’euros y nel mesmu periodu de 2019, l’últimu añu normal enantes de la pandemia, foi de 1,7 millones. El recibu doblóse, y fízolo a pesar de que la institución académica algamó amenorgar el consumu un 12%.

El pieslle d’edificios per primer vegada na primer quincena d’agostu foi útil. Menguaron consumos tolos centros menos seis. En Xixón, Marina Civil. N’Uviéu, la Escuela de Mines y l’Edificiu Blancu del campus de Los Catalanes. Amás de tres edificios d’El Cristo, onde nun puen desenchufase equipos informáticos o d’investigación, como’l bioteriu.

La factura del gas tamién medró. Cuasi un 50% al respective de va cuatro años cuando la Universidá algamó aforrar más d’un 5% en calefacción. Adelantóse l’apagáu un mes, d’abril a marzu, xusto cuando se dispararon los precios.

Ignacio Villaverde, rector de la Universidá d’Uviéu, afirma que "en 2019 pagamos lluz y gas al rodiu de 2,5 millones. Eso yá lo consumimos el primer semestre. Calculamos qu’esti añu acabaremos al rodiu de siete millones d’euros. Cuasi cuatro vegaes más que nun añu normal". Supón más d’un 2% del presupuestu añal de 219 millones d’euros.

Un impactu grave, diz el rector, qu’obligó, por exemplu, a posponer la convocatoria de programes propios d’investigación.