La crisis del 98 y un testu d'Elvira Lindo abren la EBAU n'Asturies

La espublización de les notes va ser el 9 de xunetu

Les pruebes de la Evaluación de Bachilleratu pal Accesu a la Universidá (EBAU) n'Asturies, nes que participen cerca de 5.000 alumnos, empezaron esti martes colos esámenes d'Hestoria, con entrugues sobro la crisis del 98 o la Guerra Civil española, y un comentariu sobro un testu d'Elvira Lindo en Llingua Castellana y Lliteratura II.

Nel esame de Llingua Castellana y Lliteratura II los alumnos tuvieron que responder a delles entrugues y analizar el testu 'Te la estás jugando', nel que la periodista y escritora Elvira Lindo aborda'l problema social xeneráu polos munchos locales de xuegu.

Los alumnos tamién s'enfrentaron al esame d'Hestoria, nel que teníen que responder a cinco de les diez entrugues plantegaes sobro cuestiones como les consecuencies pa España de la crisis del 98, les desamortizaciones de Mendizábal y Madoz, les causes de la Guerra de Sucesión española, la dictadura de Primo de Rivera, la Guerra Civil española o'l tresformamientu de la sociedá española nel franquismu.

Un total de 4.975 estudiantes empecipiaron esti martes n'Asturies les pruebes de la EBAU, que se van allargar hasta'l xueves.

Les pruebes fáense anguaño en 14 sedes de nueve conceyos p'amenorgar los desplazamientos de los alumnos que faen los esámenes en grandes espacios, principalmente polideportivos, pa garantizar el distanciamientu necesariu pola pandemia del coronavirus.

La espublización de les notes va ser el 9 de xunetu al traviés de la páxina web de la Universidá d'Uviéu, que va celebrar la convocatoria estraordinaria del 21 al 23 de xunetu.