La familia d'Ardines diz que'l veredictu "fai xusticia"

La vilba y los dos fíos del edil asesináu agradecen la dedicación y l'esfuerzu al xuráu

La familia del conceyal d'IX de Llanes Javier Ardines, asesináu nes proximidaes de la so casa'l 16 d'agostu de 2018, aseguró esti xueves que'l veredictu del xuráu que declara la culpabilidá de los cuatro acusaos del crime “fixo xusticia” anque naide puea reparar yá'l dañu que-yos causaron los sos asesinos.La vilba y los dos fíos del edil asesináu emitieron güei un comunicáu onde agradecen la dedicación y l'esfuerzu de los miembros del xuráu que, según señalen, “con independencia del resultáu del veredictu, cumplieron exemplarmente con un altu deber ciudadanu”.

Pa la familia, el xuráu dictó ayeri un “contundente, encontáu y unánime” veredictu de culpabilidá escontra Pedro Nieva, Jesús Muguruza, Djilali Benatia y Maamar Kelli como inductor, intermediariu y sicarios del crime y amuesa amás el so agradecimientu al “fondu trabayu” fechu polos axentes de la Guardia Civil y de la so Unidá Central Operativa (UCO), que llogró esclariar los fechos tres una “fonda investigación.

Un agradecimientu que faen estensivu al so lletráu, Antonio Pineda, pol trabayu fechu estos tres años como acusación particular y a la fiscal encargada del casu, de la que destaquen la so oxetividá demostrando “una peralta profesionalidá” que, según resalta la familia, contribuyó fondamente al esclarecimiento de los fechos.