La fiscal cimera asegura que foi decisión personal incluyir el casu Niemeyer en Delitos Económicos

Tres exconseyeres de Cultura van testificar nel xuiciu

La Fundación Niemeyer, que lleva alantre l'acusación particular, apela a la prudencia y evita opinar sobre l'escritu de la Fiscalía, que pide un total de 25 años y 3 meses de cárcel pa los cinco encausaos nel procedimientu xudicial.

Fuentes consultaes reconocen que van tener que cuantificar el supuestu perxuiciu económicu, causáu por Natalio Grueso.

Factures supuestamente alteriaes, subvenciones perdíes y la consecuencia d'un concursu d'acreedores, maticen.

La Fiscalía llama a declarar a toles ex-presidentes de la Fundación, ex-conseyeres de Cultura, salvo a la última, a Ana González. Tamién a dellos familiares de los encausaos.

Foro, la única acusación popular nel procesu, celebra que'l Ministeriu Públicu evidencie les denuncies d'irregularidá que formuló'l Gobiernu d'Álvarez-Cascos.

L'abogáu defensor de Natalio Grueso llamenta que'l fiscal incluyera delitos, como'l de malversación, que nunca se denunciaron nin investigaron cuando la instrucción. Caltién que la responsabilidá última de lo socedío correspuende a los patronos.

La defensa de la esposa de Grueso considera que la única figura penal que podría aplicase al so veceru sedría la "participación a títulu lucrativu".

Un casu similar, asegura, al de la Infanta Cristina o la ex-ministra Ana Mato.

TPA Noticies intentó contactar, ensin ésitu, con José Luis Rebollo, pal que la Fiscalía pide 27 meses de prisión.

L'abogáu de Marc Martí, ex-xefe de producción, sostién que van demostrar que toles cantidaes recibíes tienen xustificación polos servicios prestaos.

La Fiscal Cimera d'Asturies asegura que foi decisión personal incluyir el casu Niemeyer na sección especializada en Delitos Económicos, ante la baxa por enfermedá del fiscal d'Avilés qu'instruyó'l casu.

Esther Fernández niega qu'esistan influencies polítiques y defende l'escritu ellaboráu pol fiscal Alejandro Cavaleiro.