La lluvia nun basta pa llevantar el protocolu de contaminación

La contaminación en Xixón, centru del debate, xenera malestar ente los vecinos d’El Llauredal

El Principáu caltién el protocolu por contaminación en nivel preventivu o nivel 0 nel centru d’Asturies. Los niveles de concentración de partícules PM 2,5 y PM 10 esperimentaron una mengua nes últimes xornaes.

A pesar d’ello, les precipitaciones fueron menos de lo que s’esperaba y entovía nun se desactivó’l protocolu. La situación podría siguir igual tola xornada.

La contaminación en Xixón sigue siendo centru de debate y xenerando malestar, sobre manera, ente los vecinos de la zona oeste, de les más afectaes. Quexes polos golores davezu, por un aire qu’a vegaes ye irrespirable pero, sobre manera, pola falta de midíes y el desinterés políticu de les instituciones.
 
Un equipu de diez operarios municipales trabaya na zona con baldeos nes cais pa intentar minimizar los efectos de la contaminación. 

El Principáu yá dio anuncia de qu’instalará una estación mididora propia n’El Llauredal pero, mientres, dende l’ayuntamientu piden que se tengan en cuenta los datos de la estación d’anguaño, anque seya municipal, y que s’active’l protocolu por contaminación.

Pero’l Principáu nun va activar, enagora, el so plan d’alerta contaminante na contornada. Recuérda-y, eso sí, al gobiernu local, que’l Consistoriu tien potestá p’aplicar les midíes que considere afayadices, inclusive, restricciones de tráficu.