La sentencia del casu Renedo sedrá notificada'l 1 de setiembre

El macroxuiciu quedó vistu pa sentencia va cuasi un añu

La sección tercera de l'Audiencia Provincial dictó güei una providencia na que comunica a les partes que la sentencia del conocíu como casu Renedo sedrá notificada'l 1 de setiembre, informó'l Tribunal Cimeru de Xusticia d'Asturies (TCXA).

Nun oficiu cursáu a mediaos de mes al TCXA nel que se solicitaba'l caltenimientu de la exención de repartu del maxistráu ponente, la Sala avanzaba que la sentencia podría notificase'l día 31 de xunetu o nel so defectu'l 1 de setiembre, como finalmente se resolvió.

El macroxuiciu pol nomáu Caso Renedo, la mayor causa de corrupción investigada n'Asturies pola axudicación irregular de contratos públicos a empreses, quedó vistu pa sentencia va cuasi un añu, el 29 de xunetu de 2016, dempués de cuasi cuatro meses de vista oral.

Cuasi 40 sesiones y la declaración de más d'un centenar de testigos socediéronse dende'l 4 d'abril nuna causa que sentó nel banquín a 13 procesaos, ente ellos l'ex-conseyeru d'Educación José Luis Iglesias Riopedre, y la so númberu dos nesi departamentu, María Jesús Otero, que s'enfrenten a penes de 10 años y mediu y 11 años y mediu de cárcel, respectivamente.

Na providencia agora dictada'l Tribunal detalla'l mou en que se llevarán alantre les notificaciones de la sentencia.

Les de los procuradores de les partes sedrán ente les 10:30 y las 11:30 hores pel sistema "lexnet" utilizáu davezu pa la comunicación de les resoluciones xudiciales a estos profesionales.

Al Ministeriu Fiscal, que nun ta inxertu nesi sistema, daráse-y la notificación esi día de forma ordinaria.

Pa rematar, a los acusaos, responsables civiles y perxudicaos dirá notificándose-yos la sentencia en feches posteriores al día 1, na Secretaría del Tribunal a los domiciliaos nel partíu xudicial d'Uviéu y al traviés d'exhortu a los que viven fuera d'esta demarcación.

La providencia recuerda que mientres que nun se practique la última de les notificaciones personales de la sentencia o de les resoluciones que conceden o denieguen la so aclaración nun s'entamará'l plazu pa dar anuncia del recursu.