Les plantes españoles de Vesuvius son más productives y eficientes que les d'Europa del Este

Los trabayadores contesten nun informe a los argumentos de la compañía pa la deslocalización

Les plantes de Vesuvius en Llangréu y Miranda de Ebro son más productives y eficientes que les fábriques turques o d'Europa del Este, onde la compañía quier deslocalizar l'actividá. Estos son dalgunos de los argumentos del plan de reorganización industrial fechu polos trabayadores y que ta en manes de la multinacional.

L'informe polos trabayadores trata de desmontar los motivos organizativos que-yos planteó Vesuvius pa treslladar la producción fuera. El primeru ye que'l 90% de los veceros, de Francia, Italia y Portugal, nun tán más cerca de les plantas d'Europa del Este.

Otru argumentu a favor de la planta de Riañu ye que los veceros valoren la fiabilidá de la fabricación asturiana. La planta de Llangréu ye la que menos quexes tien del grupu n'Europa y la de menor númberu de pieces refugaes polos propios controles internos de Vesuvius.

A la calidá amiéstase la eficiencia, que roza'l 100%. Los trabayadores, basándose nos parámetros presentaos pola propia compañía, destaquen nel so informe qu'un operariu ye ente un 15 y un 40% más productivu n'Asturies qu'en Turquía, Polonia o la República Checa; llugares onde l'absentismu llaboral llega a triplicar los rexistraos en Llangréu y Miranda.

L'informe recuerda amás les midíes de flexibilidá qu'hubo nel últimu conveniu y que dexa, dende'l puntu de vista empresarial, ser más competitivos.

Los trabayadores llamenten que la empresa escaeciere estos datos y namái tuviere en cuenta unu: qu'un operariu en Turquía, Polonia o Chequia ye un 50% más baratu que n'España, anque recuerden que naquelles fábriques necesiten plantiyes cuatro veces más grandes pa producir la mesma cantidá que n'España.

Por estes razones, la propuesta de los trabayadores ye invertir na automatización de los procesos y aplicar les meyores tecnolóxiques que se diseñaron n'Asturies pa tol grupu, en cuenta deslocalizales xunto a la producción. Aseguren qu'esa inversión saldría más barata que les indemnizaciones por despidu.

Dende los sindicatos defenden qu'España ye un entornu más favoratible tanto xeopolíticamente, como n'investigación, como en respetu a los derechos llaborales. Ye un mensaxe llanzáu a una compañía que quier distinguise, polo menos en teoría, pola so responsablidá social.