Les térmiques de Soutu y Lada dexen d’inyectar electricidá al sistema

Los sindicatos de Lada confíen na recolocación prometida por Iberdrola

España adelántase nel cumplimientu de los compromisos europeos pa llegar a la neutralidá d’emisiones en 2050 col pieslle esti martes de siete centrales térmiques. Les centrales de Soutu y Lada dexen d’inyectar electricidá al sistema

Víctor Manuel Álvarez ye unu de los últimos de Soutu, d’esa decena de trabayadores que queden güei na cai, día en que tien que dexar de producir enerxía. Tristura y incredulidá nos güeyos d’Ángel Menéndez, 20 años al frente d’una empresa subcontratada pola térmica.

Na central de Soutu llegó a haber más de 250 trabayadores pa los que se fizo un pobláu que güei ta desiertu. La esperanza ye que’l futuru guarde una segunda vida a la térmica que dio vida y trabayu a tola zona.

Los sindicatos de Lada confíen na recolocación prometida por Iberdrola

Na otra térmica afectada, la de Lada en Llangréu, los trabayadores celebren una asamblea abierta na qu’estudien midíes escontra’l pieslle. Lo sindicatos confíen en que los planes d’Iberdrola pa Velilla seya camín andáu pal futuru de la central llangreana.

La compañía tien un añu de plazu pa facer efectivu’l so pieslle. Con reserva estratéxica, la central nun quema carbón dende entamos d’añu. La so plantiya menguó na última década al 50%. Anguaño trabayen 70 trabayadores directos y unos 50 de contrata.

La central adaptóse nos últimos tiempos p’amenorgar les sos emisiones. Iberdrola garantiza la recolocación de los sos trabayadores, pero esmolez tol texíu industrial na zona.

Representantes de los trabayadores entamarán una ronda de contactos con responsables políticos locales y rexonales esta mesma selmana.​

El sector de la enerxía anovable xenera 5.400 trabayos n’Asturies, según CCOO

La industria venceyada cola enerxía anovable da trabayu n’Asturies a más de 5.000 persones, según Comisiones Obreres. El sindicatu presentó un documentu de Propuestes pa la Reactivación Económica d'Asturies nel que plantea la oportunidá de medría económica nesi ámbitu, ente otros.

Critica que tanto Iberdrola como Naturgy llegaren a la fecha de güei ensin presentar una alternativa pa les dos zones onde les sos centrales de carbón paren la so actividá.