Les viviendes collaboratives de Llanera tarán preparaes en 2023

El futuru complexu residencial sedrá eficiente y sostenible col mediuambiente

Les viviendes collaboratives que se proyecten en Caraviés, Llanera, podríen entamar a construyise en setiembre d’esti mesmu añu. El proyectu cunta yá con un estudiu d’impactu ambiental favoratible y una fecha, 2023, pa que finalicen les obres.

Güei, la cooperativa que lo promueve, l’Ayuntamientu de Llanera y el Principáu entamaron a llantar los árboles qu’actuarán de barrera vexetal del complexu, una de les propuestes pa facelo más sostenible col mediuambiente.

El proyectu Cohousing de Caraviés, en Llanera, cunta yá col preste al estudiu d’impactu ambiental. Venti de les 36 futures viviendes collaboratives tán ocupaes. Pal restu, hai llista d’espera, porque quier axuntase delles franxes d’edá.

El futuru complexu residencial sedrá eficiente y sostenible col mediuambiente. Pa ello, güei entamaron a llantase 400 árboles qu’actuarán de pantalla vexetal escontra’l vientu.

La inversión total algama los cuatro millones d’euros, financiaos dafechu polos cooperativistes, y col sofitu del Principáu y l’Ayuntamientu de Llanera.

Llanera con Sariegu los dos conceyos onde hai proyectos de Cohousing más avanzaos. Anque, según el Principáu, hai interés por llevar alantre polo menos otres cuatro iniciatives asemeyaes n’otros llugares d’Asturies como Xixón o Les Regueres.