Los 78 conceyos d'Asturies preparen les urnes pa la triple cita electoral

Los candidatos pasen la xornada de reflexón ente amigos, familia y la práctica del deporte

Dellos de los 615 locales electorales distribuyíos pelos 78 conceyos asturianos concluyeron esta mañana l'allugamientu de les urnes, cabines y tol dispositivu electoral.

Too quedó iguao pa les elecciones locales, autonómiques y europees de mañana. Cuasi 975.000 asturianos tienen derechu a votu. Son 30.000 menos que va cuatro años.

Manuel Ángel Hidalgo ye l'alma máter de les elecciones n'Avilés. Dende fai 30 años encárgase de preparar cada cita electoral. Les de mañana asegura que fueron de les más complicaes. Entamó en total 24 elecciones, lo que dexa na so memoria decenes d'anécdotes.

Hildago como cada viéspora electoral percuerre güei los 20 colexos electorales de la ciudá. Comprueba y certifica que les papeletes, les urnes y les cabines tán llistes pa les votaciones.

Los candidatos, ente amigos, familia y la práctica del deporte

A la espera de la cita de mañana, los candidatos aprovechen esti día pa folgar y tar colos suyos, dempués de la campaña.

Familia y amigos foi'l plan preferíu pola mayoría, anque hai quien optó por lliberar adrenalina faciendo deporte.

El candidatu socialista a la presidencia del Principáu Adrián Barbón ta aprovechando esta xornada ensin actos políticos pa pasiar ensin salir del so conceyu. El fallecimientu d'un amigu modificó los planes pa la tarde.

L'aspirante del Partido Popular Teresa Mallada entamó'l día faciendo deporte. Xugando al pádel con compañeros del partíu y "pela tarde colos neños".

Lorena Gil de Podemos alloñóse del mundanal ruíu na que foi la casa de sos güelos. Equí reláxase dempués de la campaña xunto a la so familia.

Arrodiada de los suyos pero nun ambiente más urbanu, Ángela Vallina, candidata d'IX a la presidencia asturiana, tamién va tar güei nel so conceyu, Castrillón.

Paséu urbanu tamién pa Juan Vázquez candidatu de Ciudadanos, que güei durmió un poco más qu'otros díes y salió a correr pel Parque Iviernu.

El candidatu de Vox Ignacio Blanco escoyó la bici pa desconectar. 48 kilómetros y dos hores de ruta con salida y meta en Xixón.

Carmen Moriyón, cabeza de llista de Foro, tuvo na so casa de Somió, en Xixón, tola mañana.