Los condenaos pol Casu Renedo pasen la so primer nueche en prisión

Riopedre cumplirá la so condena nel módulu d'Enfermería de la cárcel d'Asturies

Los condenaos pol Casu Renedo pasaron la so primer nueche en prisión dempués d'executase la sentencia. L'ex-conseyeru d'Educación, José Luis Iglesias Riopedre, fízolo nel módulu d'Enfermería, onde cumplirá la so condena.

Los empresarios sedrán treslladaos a les unidaes terapeútiques, dempués de pasar la nueche nel módulu d'ingresos. N'Álava, María Jesús Otero y Marta Renedo siguen nel módulu de muyeres.

A les 20:45 de la nueche llegaba l'ex-conseyeru Iglesias Riopedre a la cárcel d'Asturies. Facíalo acompañáu por dellos familiares. El reconocimientu médicu afitaba que fuere lleváu a enfermería. Y ellí pasó la so primer nueche en prisión dempués d'executase la sentencia. Por cuestiones médiques, siguirá cumpliendo la so condena nel módulu d'enfermería.

Los dos empresarios pasaron la nueche nel módulu d'ingresos. Esta mañana, visitólos l'equipu técnicu formáu por psicológos, educadores y trabayador social que decidieron que la UTE ye'l módulu más afayadizu pa que cumplan les sos penes. Ellí sedrán treslladaos a primer hora de la tarde.

Marta Renedo y María Jesús Otero, per parte de so, tán nel mesmu departamentu na cárcel d'Álava. Nel módulu de muyeres.

El penal ye unu de los más modernos d'España, la ocupación malapenes supera'l 50% de la so capacidá. Y de los 600 internos colos que cuenta, namái 74 son muyeres.

El centru cuenta con polideportivu cubiertu, frontón, ximnasiu, piscina terapéutica y clases pa informática y música. Amás d'una Enfermería con telemedicina.