Los condergaos del Casu Renedo reclamen al TS l'anulación de les sos penes

Marta Renedo alega que nun tuvo derechu a un xuiciu xustu

Los principales condergaos pol Casu Renedo reclamen énte'l Supremu l'anulación de les sos penes. Nel so recursu, Marta Renedo, la única qu'hasta agora asumió parte de la so responsabilidá nel procesu, alega que nun tuvo derechu a un xuiciu xustu porque unu de los maxistraos, el presidente del tribunal, taba, sorraya, contamináu.

Esto ye, resolviera en fase d'instrucción recursos que teníen que ver con esti procedimientu y, por ello, afirmen, tendría qu'abstenese.

La so defensa echa mano de la sentencia del Casu Garzón y sorraya que'l fechu de que s'interviniera la comunicación con tres de los sos abogaos, boicoteó-y la so llinia de defensa.

El restu d'acusaos usen como principales argumentos la vulneración del secretu de les comunicaciones, poles intervenciones telefóniques, y la falta de pruebes de cargu pa condergalos. Ye'l casu de María Jesús Otero, condergada a nueve años y mediu de prisión, o los empresarios d'Igrafo y Almacenes Pumarín, condergaos a seis años y mediu.

La defensa d'Otero tamién afonda na vulneración del derechu a la defensa, pola prórroga del secretu de sumariu, y nes dilaciones indebíes, por tardar tanto na fase d'instrucción como a la hora de dictar sentencia.

Argumentos similares plantegó la defensa del ex-conseyeru José Luis Iglesias Riopedre, condergáu a seis años de prisión. Foi'l primeru que presentó'l recursu énte'l Supremu.