Los forenses ratifiquen l'informe de l'autopsia d'Imran

El neñu finó por un cuadru oplicontusivu

La muerte del neñu de 21 meses, del que s'atopó'l calabre nuna maleta'l 3 de payares de 2014 n'Uviéu, y pola que tán acusaos David F. y la madre del menor Fadila C., llevaba muertu polo menos tres díes, según los forenses qu'aseguraron que'l menor sufrió "gran violencia" en tres etapes distintes.

Los dos médicos forenses que participaron nel llevantamientu del cuerpu ensin vida y l'autopsia fecha al neñu asina lo conseñaron güei na so declaración na vista del xuiciu que se celebra na sección tercera de l'Audiencia Provincial d'Uviéu.

Acordies colos médicos forenses, que rellataron la esistencia de "golpes, emburriones y arrastre" cometíos sobre'l menor, nuna "desproporción" de los mesmos que cualquier de los dos acusaos podría cometelos.

Ratificáronse nel informe de l'autopsia fecha al neñu. Participaren nel llevantamientu del calabre, y el cuerpu del neñu, enantes de la evacuación al Institutu de Medicina Llegal, foi treslladáu al HUCA onde-y ficieron un 'tac'.
Na so declaración revelaron que nel menor vieron dos mancadures con frañadures, una nuna costiella que se taba consolidando y otra nel fémur, que nun taba alliniada y tenía acurtiamientu, y que tamién se ve una durez ósea que denota que presentaba dellos díes, amás d'una luxación nel pescuezu.

Nel esame esternu fechu al neñu "llama l'atención" que nel llombu namás esistía una mancadura na zona renal, mientres que'l restu de mancadures taben nel craniu, la cara, el tueru y les estremidaes en mayor o menor midida.

Los médicos forenses, que sostuvieron que l'esame internu detecta mancadures por traumatismu directu, agresiones y tamién una quemadura esterna, describieron la esistencia d'una discreta hemorraxa nel pechu y otres dos na cabeza.

Foi una muerte violenta, de naturaleza homicida, con una mancadura visceral interna y mancadures encefáliques, toes importantes, dixeron los declarantes qu'atribuyeron les mancadures causaes a los impactos y el ximielgue.

Al so xuiciu, la impresión que dan les mancadures ye la de "llanzar al neñu con muncha violencia" y "impulsalu mui fuerte", quiciabes en "más d'una ocasión", y que les mancadures causaríen "enforma dolor" al menor.

Sobre la esploración realizada a Fadila C. esplicaron que se ve una moza con intelixencia normal, ensin trestornos, quiciabes un poco fría, que-yos dixo que la única vegada que consumió cocaína na so vida fízolo forciada.

L'acusada nun presentaba signos de ser una muyer maltratada, anque por mor del consumu de droga indicaron que-yos faló de más conflictividá col so compañeru.

Al respective de David F. conseñaron qu'estremaba perfectamente ente'l bien y el mal, y qu'intentó alicar al neñu faciéndo-y la respiración boca a boca, y que dempués pensó cómo desfacese d'él al comprobar el so fallecimientu.

Pa los médicos forenses, David F. "sabía perbién lo que facía", y apuntaron qu'emocionalmente amosóse "abondo fundíu" na primera de les dos reconocencies, y nun se constataba "mengua relevante sobre raciociniu y memoria".

Atribuyéron-y un trestornu de personalidá, nel que predomina una autoestima baxa y vese inferior a los demás, d'ende que pa socializar s'ayude del alcohol y la droga, que se convirtieron nun vezu.

Asina, sostuvieron que David F. almitió'l consumu de cocaína y h.axís na so vida, que xiraba alredor de la primera d'estes drogues, lo que-y fixo perder munchos puestos de trabayu, creó-y problemes familiares y estrozó-y la esistencia.

Enantes del episodiu que se xulga, l'acusáu tenía una conducta "coherente y centrada", anque con comportamientos alteriaos pol consumu de droga.

Al entamu de la vista d'esta mañana l'abogada de Fadila C. solicitó l'audición de la llamada fecha por David F. al serviciu d'emerxencies 112.

"Toi en busca y captura", escuchábase dicir a David F., qu'afirmaba que quería comunicar que taba en Lleón nun parque nel barriu de Ventas, dende'l que llamaba en rellación a la "desapaición d'un neñu n'Uviéu".

"Por favor, que nun monten espectáculu", pidió'l procesáu a la persona que lu atendía nel númberu d'emerxencia en referencia al momentu nel que lu prindara la Policía.