Los ganaderos asturianos clamen escontra'l blindaxe del llobu

Transición Ecolóxica diz que puen siguir aplicándose los planes de control de les comunidaes

Mientres los estrozos del llobu sumen la muerte de más de mediu centenar de vaques pel branu namás n’Amieva y Ponga, dende güei esta especie ta protexida en toa España. La decisión ministerial, qu’afita unes midíes de control que namás s’aplicarán de manera escepcional, cayó como una xarra d’agua frío ente los ganaderos.

Que los ganaderos apliquen midíes de prevención y protección de los sos animales, como los zarraos o l’usu de perros guardianes del rebañu, y qu’estes fueren ineficaces pa evitar los ataques, sedrá un primer requisitu pa cualquier midida de control.

Como dio anuncia’l ministeriu de Transición Ecolóxica, enagora, les midíes de control que lleven alantre les comunidaes autónomes tendrán qu’axustase a la normativa estatal y comunitaria, pa lo que se redactará un protocolu coordináu d’intervención pa la estracción escepcional de dalgunos exemplares.

Ganaderos d’El Franco denuncien ataques de llobu na capital del conceyu

Los ganaderos d’El Franco denuncien ataques de llobu nel cascu urbanu de la capital del conceyu. Ún de los últimos foi’l que tuvo llugar la nueche del domingu al llunes, nun tarrén cerca de la nacional y de delles cases.

El llobu mató siete oveyes. Ye la primer vegada que se rexistren ataques de llobu nesta zona tan cerca de la costa nesi conceyu.

Transición Ecolóxica diz que se puen siguir aplicando los planes de control de les comunidaes

Dende’l Ministeriu de Transición Ecolóxica aseguren que se ta trabayando nuna nueva estratexa del llobu n’España que dexará meyores compensaciones pa evitar que’l pesu del caltenimientu del llobu recaiga sobre los ganaderos.

Col nuevu modelu existirá responsabilidá patrimonial de l’alministración a la hora d’indemnizar.

Amás, el director xeneral de Biodiversidá, Jorge Marquínez, diz que cola nueva norma’l Plan de Xestión y Control del llobu n’Asturies sigue vixente, atendiendo a los criterios que se recueyen na nueva normativa.​