Los presupuestos pa 2018 siguen nel aire

Enmienda parcial de Foro al presupuestu pa recuperar les ayudes a la natalidá

Los presupuestos pa 2018 siguen nel aire a dos díes de qu'acabe'l plazu pa la presentación d'enmiendes de totalidá.

El Gobiernu rexonal aseguró que ficiera "cesiones importantes" na negociación presupuestaria con Podemos y IX pa consiguir l'aprobación del so proyectu de presupuestos y torgar asina una prórroga.

Nin Podemos nin PP tienen clara la so decisión. Dambes formaciones trabayen tanto nel escenariu de totalidá como nel de les enmiendes parciales. Ye esta última opción pola que se decantó Foro.

La so presidenta Cristina Coto presentó una d'elles pa incorporar 10,8 millones n'ayudes directes a la natalidá, 150 euros mensuales por fíu hasta los 18 años.

Pa Podemos, lo ufiertao hasta'l momentu nun ye abondo. Insisten en que ye al presidente del Principáu a quien-y toca mover ficha a base de compromisos. El focu sigue puestu na exixencia d'un modelu de 0 a 3 públicu universal y gratuitu.

Ciudadanos ye, pel momentu, la única formación qu'anunció enmienda a la totalidá.

La FSA estudiará mañana nel so comité autonómicu la propuesta qu'Izquierda Xunida-y treslladó la selmana pasada con cuatro puntos a desarrollar no que queda de llexislatura: revisión de los planes locales d'empléu, avanzar na rede de 0 a 3, sentar les bases de la futura oficialidá del asturianu y l'aprobación de les lleis d'emerxencia ciudadana.

Si la FSA da el sí, la coalición sometería llueu a les bases la decisión d'aprobar o abstenese na votación del presupuestu.

Pela so parte, CCOO d'Asturies fizo un llamamáu a los partíos d'izquierda pa que s'olviden de intereses partidistes y lleguen a un alcuerdu pa qu'Asturies tenga presupuestos.

N'opinión del so secretariu xeneral el Gobiernu del Principáu tien marxe pa meyorar la propuesta de la educación de 0 a 3 años, anque considera que nun se deben cerrar puentes por un tema en concreto.