Los trabayadores d'Alcoa entamen mañana la so llucha escontra'l zarru

Concentración convocada frente a la portería de la fábrica

Los 317 trabayadores de la planta avilesina d'Alcoa tán convocaos mañana, vienres, a una primer concentración frente a la fábrica de Samalandrán, en protesta y en llucha escontra'l zarru de l'aluminera, que supondría'l despidu colectivu.

La concentración ta convocada frente a la portería de la fábrica de 14:00 a 16:00, coincidiendo col cambéu de turnu, y va suponer l'arranque d'un calendariu que ta pendiente de cerrar y que va incluyir la participación nes movilizaciones que lleven alantre los trabayadores de la planta d'Alcoa n'A Coruña, pa la que tamién s'anunció'l zarru.

Esi calendariu inclúi, según esplicó'l presidente del comité d'empresa y delegáu d'USO, Sergio Sobrido, una manifestación peles cais d'Avilés, el próximu 8 de payares.

Los trabayadores entamen estes movilizaciones arropaos por un montón de sofitos provenientes de los ámbitos políticos, institucionales y ciudadanos de toa Asturies.

El comité d'empresa de la planta d'Alcoa n'Avilés decidió na so primer xunta tres la sorpresiva anuncia de zarru que namás va falar cola compañía de siguir cola actividá.