Los trabayadores de Saint-Gobain van movilizase escontra'l zarru de Sekurit

El Principáu estudia si hai "marxe de maniobra" pa reconducir l'ERE en Saint-Gobain

Les asamblees de trabayadores de la fábrica avilesina de Saint-Gobain refugaron esti martes l'anunciu de la multinacional francesa de cerrar la división de fabricación de parabríses (Sekurit) y plantegar un ERE, y decidieron movilizase a lo llargo d'esta selmana pa visibilizar un problema “qu'afecta a Asturies”.

El comité de trabayadores espresó nun comunicáu'l so "refugu frontal” a la intención de la compañía del cese de negociu del departamentu de Sekurit n'Avilés, que cunta con unos 160 emplegaos.

“Esta midida tan traumática tanto pa les persones trabayadores de plantiya como pa les que trabayen indirectamente nes contrates que dan los sos servicios ye daqué qu'esti comité de trabayadores lleva denunciando énte les distintes alministraciones dende va munchu tiempu”, amiesta'l comunicáu.