Makelele niega que matara a la so ex-pareya, la hostelera Sonia Mitre

Entama'l xuiciu pol crime de Sonia Mitre en Xixón

L'acusáu de matar en xunetu de 2015 a la so ex-compañera sentimental, la hostelera de Xixón Sonia Meléndez Mitre, conocíu como "Makelele", negó güei ser l'autor del crime polo que la so defensa reclamó la so llibre absolución al entamu de la vista oral con xuráu popular que se celebra na Sección Octava de l'Audiencia Provincial.

Na so declaración, el senegalés refugó que tuviera na vivienda de la víctima'l día en que socedió'l crime, el 16 de xunetu de 2015, y que aquel día tuvieren rellaciones sexuales.

L'acusáu, de 35 años, enfréntase a un pidimientu por parte de la Fiscalía de 15 años de cárcel por un delitu d'homicidi. Trabayara dalgún tiempu nel establecimientu que la empresaria, de 48 años, tenía en Xixón, el Chigre Sinatra, y dambos entamaron una rellación sentimental sobre finales de 2013 o principios de 2014.

Según l'acusación del Ministeriu Públicu, col tiempu la rellación entamó a deteriorase por mor del calter autoritariu del acusáu, quien tenía "actitúes de control y de dominación tanto nel ámbitu de la rellación personal como con ocasión del desempeñu de la so actividá llaboral nos negocios de la muyer".

Too ello fizo que la muyer decidiera despidilu'l 14 de xunetu de 2015 tres una "fuerte discusión y disputa en públicu".

Naquel discutiniu, el procesáu abandonó'l local diciendo: "¡A esta fía de puta voi matala, voi facela desapaecer!".

Según la Fiscalía, l'acusáu foi dos díes depués, el 16 de xunetu de 2015, a la vivienda de la muyer y ellí cutióla repetidamente y estrangulóla.