Margarita Salas dará nome al programa asturianu pa retener científicos

Barbón fai esta anuncia nel homenaxe a la bioquímica en L.luarca

La bioquímica finada Margarita Salas dará nome al programa d’atención y retención del talentu científicu qu’impulsará’l Principáu destináu a investigadores d’afitada esperiencia internacional que tean en centros d’investigación nacionales o estranxeros pa que puean desendolcar la so carrera n’Asturies.

Esta iniciativa, de la que Salas debió ser madrina, lo que se truncó cola so muerte’l 7 de payares a los 80 años, foi anunciada esti miércoles pol presidente del Principáu, Adrián Barbón, nel homenaxe que se rindió a la científica nel marcu de la XVII Selmana de la Ciencia del so conceyu natal.

El xefe del Executivu amosóse esperanzáu na aprobación de los presupuestos del Principáu pa 2020 pa poder poner en marcha un programa que faga que’l nome de Margarita Salas "seya un referente de la vocación científica, la capacidá investigadora y el compromisu con Asturies".

Na so intervención, Barbón recordó amás que Salas yá foi homenaxeada la pasada selmana por un centenar d’estudiantes d’ocho colexos asturianos qu’interpretaron la secuencia del xenoma de la leucemia linfática crónica como una sinfonía, una melodía que suponía "arrimar l’oyíu al soníu de fondu de la vida".

A xuiciu de so, qu’esos términos cargaos de complexos significaos puen usase agora con naturalidá ye por mor del llabor de persones d’escelencia científica mundial como Salas, la bióloga que pensaba dir güei, como nos últimos años, a la entrega de los premios Severo Ochoa que lleven el nome del so maestru y que se dan a los meyores estudiantes de bachilleratu del conceyu onde dambos nacieron.