Monteserín pide al Gobiernu central qu'aplique yá'l decretu de les electrointensives

L'alcaldesa señala que'l resultáu de la subasta de la tarifa eléctrica diseñólu l'anterior Gobiernu del PP

L'alcaldesa d'Avilés, Mariví Monteserín, pidió esta mañana al Gobiernu central qu'aplique cuanto enantes el decretu pa les industries electrointensives.

Asegura qu'esta midida ye lo que necesiten empreses como Alcoa o Arcelor tres los malos resultaos de la subasta d'interrumpibilidá eléctrica.

L'alcaldesa conseñó amás que'l resultáu de la subasta de la tarifa eléctrica diseñólu l'anterior Gobiernu del PP, de manera que pidió que "caunu asuma la parte de responsabilidá que tien" porque "equí nun se pue falar por falar".

La rexidora local respondió asina a les voces crítiques col resultáu de la subasta eléctrica, anque tamién reconoció que "nun respuende a les espectatives que teníen les empreses".

"Tamién ye verdá que'l Gobiernu, sabiendo esto, fizo un Real Decretu pa cubrir les necesidaes de les industries electrointensives", declaró Monteserín a preguntes de los periodistes.

El Gobiernu local ta "en permanente contactu" col Principáu d'Asturies y l'Estáu, y neses conversaciones lo que diz Avilés ye qu'esto necesita una solución a mediu plazu "que sabemos que nun ye fácil y nun pasa namás pela interrumpibilidá, tien qu'haber otros dispositivos".