Webcams
Buscar
El so lletráu asegura que nun taba fuxíu y que taba en Madrid
L'ex-director xeneral de la Fundación Niemeyer, Natalio Grueso, entró na cárcel d'Asturies dempués de dir a primer hora d'esta mañana a l'Audiencia Provincial.
Grueso compareció énte'l tribunal que dictó escontra él una orde de prisión provisional, por tar en paraderu desconocíu, pa ser xulgáu a partir del próximu 24 de setiembre.
Natalio Grueso llegó acompañáu del so abogáu del turnu d'oficiu, José René Alperi, quien, a pesar de presentar un escritu d'arrenuncia nun pudo facela efectiva, dempués de que'l tribunal dixéra-y que tenía que presentala énte'l Colexu d'Abogaos.
Coles mesmes, el so lletráu destacó que Natalio Grueso nun taba fuxíu sinón que taba en Madrid.
Tres ser treslladáu al centru penitenciariu nun furgón de la Guardia Civil, Grueso pasó al módulu d'ingresos pa ser sometíu a una revisión médica siguiendo'l protocolu habitual qu'inclúi una entrevista col equipu multidisciplinar (médicu, psicólogu y educador social), según fontes penitenciaries.
El xueves va tener llugar una vista pa decidir si queda o non en llibertá. Pel momentu, la fecha del xuiciu ye'l próximu llunes.
Natalio Grueso encara un pidimientu de 11 años de cárcel, 10 años d'inhabilitación y una multa de 24.000 euros pola so supuesta autoría nes irregularidaes detectaes na so etapa al frente del Centru Cultural Niemeyer d'Avilés, rellacionaes cola emisión de factures falses o manipulaes.
Tamién ye acusáu de delitos siguíos de malversación en concursu medial con falsedá, otru societariu y un terceru d'insolvencia punible.
Nel procedimientu tán personaes dos acusaciones particulares: la fecha pol partíu Foro xube'l so pidimientu a 13 años de prisión y la que lleva la Fundación Centru Cultural Internacional Oscar Niemeyer, pide penes que sumen 15 años y 6 meses.
Xunto a Natalio Grueso van ser xulgaos l'axente de viaxes J.M.V.R., qu'encara un pidimientu fiscal d'ocho años como presuntu cooperador en dos delitos d'estafa y malversación, y l'abogáu José Luis Rebollo, ex-secretariu de la Fundación Niemeyer, como presuntu cooperador necesariu nun delitu societariu, sobre quien pesa un pidimientu fiscal de dos años y tres meses de prisión.
Nel banquín de los acusaos tamién van tar xunto a ellos J.P., ex-muyer de Natalio Grueso, a quien el fiscal imputa pola so presunta complicidá nun delitu siguíu de malversación, pal que pide dos años y mediu de prisión, y Marc Martí, ex-xefe de producción del Centru Niemeyer, quien encara un pidimientu d'un añu y mediu de prisión pola so presunta complicidá nun delitu de malversación.
