Otero favoreció a les empreses cola conocencia de Riopedre

L’Audiencia Provincial da llectura a la sentencia que ve imposible cuantificar el perxuiciu económicu

L’ex-conseyeru d’Educación del Principáu, José Luis Iglesias Riopedre, y la so númberu dos, María Jesús Otero, favorecieron axudicaciones a les empreses acusaes nel casu Marea anque la sentencia caltién la dulda razonable de que’l primeru tuviere al corriente del métode usáu pola so directora xeneral.

Según el relatu de fechos probaos al que güei dio llectura’l maxistráu ponente de la sentencia, Francisco Javier Rodríguez, Otero, condergada a nueve años y mediu de prisión, y Riopedre, condergáu a seis años, actuaron asina en beneficiu de les compañíes de los empresarios procesaos correspondientes nos más de los casos a productos homologaos y negociaos ensin publicidá.

A xuiciu del tribunal, esta actuación necesitó que dos de los empresarios condergaos -Víctor Manuel Muñiz, d’Igrafo, y Alfonso Carlos Sánchez, d’APSA- cuntaren "polo menos cola collaboración" d’Otero poles grandes competencies que-y daba’l so cargu como directora xeneral de Planificación de la Conseyería d’Educación.

El tribunal considera probao qu’Otero recibió per esta vía en forma de regalos y servicios daqué más d’un millón d’euros d’Igrafo y otros 800.000 d’Almacenes Pumarín y alvierte de que, por mor del sistema usáu, foi imposible hasta agora determinar el perxuiciu ocasionáu a l’alministración autonómica.

Anque la sentencia señala qu’Otero, que controlaba "tol" procesu de contratación y a cambiu recibió regalos de les empreses, cuntó cola conocencia y el permisu del conseyeru pa favorecer tou tipu de contratos a Igrafo y Apsa, el tribunal caltién "la dulda razonable" de que Riopedre tuviere "al corriente" de les práctiques de la so númberu dos colos propietarios, condergaos dambos a seis años y mediu de prisión.

La sentencia, que sedrá notificada mañana a les partes, sí considera que l’ex-conseyeru, de 77 años, pautó con Otero y con Muñiz l’encargu d’estudios pa l’inxerimientu de sistemes xeotérmicos de calefacción pa dellos centros educativos de la rexón.

Dempués de facer una dixebra de los contratos pa evitar la so llicitación pública y axudicalos a la empresa “Nora Proyectos e Ingeniería”, los estudios fueron finalmente fechos por una sociedá de la que yera propietariu’l fíu del conseyeru, Enrique Iglesias, tamién procesáu na causa y condergáu a responder solidariamente de les indemnizaciones de Muñiz en 99.405 euros en calidá de partícipe a títulu llucrativu.

La sentencia considera probao que los empresarios taben "na cume de la toma de decisiones" p’articular un sistema pa ser axudicatarios de contratos públicos al traviés d’una concurrencia "que nun yera tala".

Nel casu de la funcionaria Marta Renedo, condergada a nueve años de prisión, la sentencia relata cómo abrió delles cuentes cuando trabayaba pa la Conseyería de Servicios Sociales a nome de persones que pidiern sofitos públicos usando los datos personales qu’estos dieren.

Neses cuentes Renedo recibió dellos pagos d’empreses como Asac Comunicaciones, que, a iniciativa de la funcionaria, contrató y pagó los salarios de cuatro persones que ficieron delles funciones n’equipamientos del Principáu ensin espediente alministrativu dalgún na Conseyería de Cultura.

La trama creada por Renedo fízo-y recibir numberosos pagos por "actuaciones ficticies y servicios que nunca se prestaron" d’empreses pal Principáu cuando la funcionaria pasó a depender de los departamentos de Cultura y d’Alministraciones Públiques porque, pol so cargu, podía autorizar contratos menores.

Esta actuación yera, según la sentencia, inorada polos sos superiores xerárquicos na alministración, robla que falsificó delles vegaes lo que-y dexó amás recibir ingresos de les compañíes involucraes al traviés d’una empresa fecha por ella en 2008 na que, pa dar apariencia d’actividá, dio d’alta a persones cercanes como la profesora d’inglés de los sos fíos.

Dempués de la llectura de los fechos probaos y del fallu de la sentencia, que s’allargó cuasi dos hores, el tribunal procederá mañana a notificar a les partes el testu completu de la resolución xudicial, que se prevé que cunte con más de mil páxines.

Al acabar l’audiencia pública l’abogáu que representa l’acusación particular de Podemos, Alberto Suárez, llamentó que’l tribunal nun atendiere la so solicitú de celebración darréu d’una 'vistina' pa pidir l’ingresu en prisión provisional de los condergaos al ver riesgu de fuga.

Sicasí, el presidente del tribunal y ponente del fallu, Francisco Javier Rodríguez, optó por aplazar la convocatoria de la 'vistina' a la espera de coordinar les axendes de les partes presentes na causa, poro, la fecha más probable pa qu’esta se celebre sedrá la del 25 ó 26 de setiembre.

A xuiciu del lletráu de Podemos, les condergues impuestes a los ocho condergaos, que sumen más de 40 años de cárcel, "son altes" y son persones "que robaron cantidaes importantes de dineru" colo que tien "medios y disponibilidá" de fondos. Poro, na so opinión, "claro qu’hai riesgu de fuga".