Pendientes del treslláu al Supremu de la documentación del Casu Renedo

La intención ye que llegue a Madrid enantes qu'acabe esti añu

El Principáu yá se punxo en contactu cola Audiencia pa estudiar cómo se va a treslladar al Tribunal Supremu, en Madrid, tola documentación del Casu Renedo.

La intención ye que llegue primero qu'acabe esti añu. Decenes de caxes y miles d'archivos que van ser la base pal análisis de los recursos presentaos poles partes.

Una parte importante de la documentación ta inda nel despachu d'unu de los maxistraos qu'ellaboró la sentencia. Una ventena de caxes cola documentación que valió p'afitar el fallu xudicial.

Namás na fase d'instrucción, el casu sumó más de 60.000 folios qu'enllenen un armariu completu d'una de les sales de l'Audiencia onde trabayen los funcionarios.

La sección tercera de l'Audiencia tuvo que pidir que s'habilitara una sala especial p'allugar parte de los archivos.

Agora va ser el Supremu'l que tenga que ratificar o non la sentencia de l'Audiencia que conderga a seis años de prisión al ex-conseyeru d'Educación y nueve años y nueve años y mediu a Marta Renedo y María Jesús Otero, respectivamente.

Los empresarios d'Igrafo y APSA fueron condergaos a seis años y mediu de cárcel. Toos ellos recurrieron la sentencia.