Pérez Villalta desvencéyase del proyectu del Xeriátricu de Felechosa

El Principáu ufierta la so collaboración na investigación sobre'l xeriátricu

La investigación pola operación Hulla sigue abierta y nun se refuga qu'haya nueves imputaciones. Les miraes tán puestes agora nel que fuera alcalde d'Ayer y ex-presidente de l'Asociación de les Comarques Mineres, Gabriel Pérez Villalta.

El so nome figura nel llistáu de la Fiscalía como integrante de la mesa rexonal de la minería que distribuyó los fondos pa la Residencia. La investigación tamién señala que, como alcalde, dio la llicencia pal xeriátricu, tando ésti en suelu rústicu, y cuando yá se llevaben 17 certificaciones d'obra.

Na investigación, la UCO atopó documentación nel consistoriu. Villalta ye l'únicu de los integrantes de la mesa citaos por Anticorrupción que nun declaró, pel momentu, nin como testigu nin como investigáu. En declaraciones a TPA, Pérez Villalta asegura que nada tuvo que ver con esi proyectu y que la inversión decidiéronla los sindicatos.

De los 200 millones d'euros que se repartíen de los fondos mineros, 29 millones fueron pa la residencia de Felechosa. La firma del alcuerdu suscribióse'l 24 de xunetu. La residencia recibía fondos tres vegaes superiores al costu, de 10 millones d'euros, que figuraba primeramente nel primer proyectu del xeriátricu.

El Principáu ufierta la so collaboración na investigación sobro'l xeriátricu

El Gobiernu asturianu aseguró güei nun recibir nengún requerimientu sobro la causa abierta pol supuestu desviamientu de fondos na construcción del xeriátricu de Felechosa y amosó la so "total disposición" a collaborar cola xusticia.

El voceru del Executivu, Guillermo Martínez, pidió que se dexe trabayar a la xusticia y qu'estes xeres se faigan "de la manera más áxil posible" anque consideró que "nun paez lóxico" qu'un gobiernu comente "cada pasu xudicial".

Sicasí, repitió que'l conveniu pa la construcción de la residencia La Minería con fondos mineros roblóse ente l'alministración central y el Montepío, que s'encargó de la execución de les obres, y que, polo tanto, al Principáu nun-y correspondía'l control y siguimientu del desenvolvimientu del proyectu.