Podemos pide al Gobiernu que recapacite y apurra dos millones más a les escueles de 0 a 3

El PP quier cambiar el presupuestu en 49,6 millones con enmiendes parciales

Podemos pidió güei al Gobiernu rexonal que recapacite y asuma la última propuesta de Podemos pa facer de baldre les escueles infantiles de cero a tres años porque naide entendería que por dos millones d'euros nun presupuestu de 4.485 millones, Asturies vaya dir a una prórroga presupuestaria.

La diputada rexonal de Podemos, Lorena Gil, referíase asina a los dos millones d'euros que, según los cálculos de la formación morada, costará facer de baldre esti cursu les 3.600 places qu'hai anguaño nes escueles de cero a tres años qu'hai abiertes en 38 conceyos asturianos.

Que seyan de baldre ye la condición que baraxa Podemos pa retirar la enmienda de totalidá que presentó a la llei de presupuestos del Principáu pa 2018 y permitir l'aprobación d'unes cuentes públiques que fueron yá pactaes por PSOE y IX, pero que nun tienen garantizada entovía la so aprobación.

En defensa d'esta propuesta, Lorena Gil tuvo güei acompañada por conceyales de les marques locales de Podemos, n'Uviéu, Xixón y Avilés porque los ayuntamientos paguen al rodiu de la metá del costu que tien esti serviciu.

El PP quier cambiar el presupuestu en 49,6 millones con enmiendes parciales

La presidenta del PP d'Asturies, Mercedes Fernández, señaló güei que les 63 enmiendes parciales del so grupu al presupuestu pa 2018, que quier mover 49,6 millones d'euros nes cuentes públiques, amuesen les "mui grandes diferencies" del so partíu col proyectu del Gobiernu.

En rueda de prensa, Fernández dixo qu'al traviés de les enmiendes parciales traten de reflexar "clares diferencies colos presupuestos unviaos a la Cámara", que se sumen a la enmienda a la totalidá de les cuentes públiques que presenten porque los presupuestos "nun son bonos p'Asturies".

Dempués d'avanzar que'l PP quier una votación a comuña de les enmiendes a la totalidá que se debaten nel plenu del vienres y que, de nun ser asina, apoyarán toles que se presenten.

Amás de la enmienda al rodiu de la supresión del impuestu de socesiones pa herederos consanguíneos como los sobrinos amás de pa los directos, que s'inxertará nel debate de totalidá al afectar a los ingresos, el PP pidirá tamién bonificaciones y deducciones pola nacencia del primer fíu con 300 euros deducibles l'añu de nacencia y los dos siguientes.

L'alcalde d'Uviéu pide a Podemos que permita l'aprobación del presupuestu

L'alcalde d'Uviéu, el socialista Wenceslao López, fizo güei un llamamientu a Podemos pa que permita qu'Asturies tenga unos presupuestos rexonales en 2018, porque ensin la so aportación estos "nun verán la lluz".

El PSOE comparte'l gobiernu local de la capital asturiana con Somos Uviéu, marca local de Podemos, y IX.

López pidió-y a la formación morada "compromisu" y que "nun mire pa otru llau" a la hora d'aprobar unos presupuestos necesarios pa los intereses de los asturianos, y recordó-y qu'en política "nun se pue dir más p'allá de lo posible".